111 വർഷങ്ങൾക്ക് ശേഷവും മങ്ങാതെ; എന്താണ് ഇരുണ്ട ആഴങ്ങളിലേക്ക് ആളുകളെ ആകർഷിക്കുന്ന ആ ടൈറ്റാനിക്ക് മാജിക്?

ഒരു തകർച്ചയായെങ്കിൽ പോലും ടൈറ്റാനിക് ആളുകൾക്ക് ഇന്നും മനോഹരമായ കാഴ്ചയാണ്. അതുകൊണ്ട് തന്നെയാണ് ഇത്ര വർഷങ്ങൾക്ക് ശേഷവും 3.8 കിലോമീറ്റർ താഴ്ചയിൽ ആ ഇരുണ്ട കടൽത്തീരം ആളുകളെ ആകർഷിക്കുന്നത്. മഞ്ഞുമലയിൽ ഇടിച്ച് തകർന്ന് 111 വർഷങ്ങൾക്ക് ശേഷവും അതിന്റെ ആകർഷണം മങ്ങാതെ തന്നെ നിലനിൽക്കുന്നു. ടൈറ്റാനിക്കിലേക്കുള്ള യാത്രയ്ക്ക് നിരവധി പ്രത്യേകതകളുണ്ട്. 1912-ൽ 1500 പേരുടെ മരണത്തിനിടയാക്കിയ ഈ കപ്പലിനടുത്തേക്ക് വളരെ കുറച്ച് ആളുകൾ മാത്രമേ എത്തിയിട്ടുള്ളു. ഇങ്ങോട്ടേക്കുള്ള യാത്രയ്ക്ക് പണം മാത്രം പോരാ. കയ്യിൽ അല്പം സാഹസികതയും വേണം. അറ്റ്ലാൻ്റിക് സമുദ്രത്തിൻ്റെ അടിത്തട്ടിൽ ടൈറ്റാനിക് കപ്പലിൻ്റെ അവശിഷ്ടങ്ങൾ കാണാൻ പുറപ്പെട്ട് കാണാതായ ടൈറ്റൺ അന്തർവാഹിനി കപ്പൽ ജൂൺ 18 നാണ് അഞ്ച് യാത്രികരുമായി യാത്ര ആരംഭിച്ചത്. ആഴക്കടലിൽ നിന്ന് അതിജീവനത്തിന്റെ വാർത്ത പ്രതീക്ഷിച്ചുള്ള ലോകത്തിന്റെ കാത്തിരിപ്പ് വിഫലമാക്കിക്കൊണ്ടാണ് ആ സങ്കട വാർത്ത മണിക്കൂറുകൾ‌ക്ക് മുമ്പ് പുറത്തുവന്നത്.

ചെലവേറിയതും അപകടസാധ്യതയുള്ളതുമായ കടലിനടിയിലെ ഈ യാത്രയ്ക്ക് ആളുകളെ ആകർഷിക്കുന്ന ഘടകം എന്താണ്? ആഴക്കടലിൽ ഇവരെ കാത്തിരിക്കുന്ന കാഴ്ച്ച എന്താണ്?

1985-ൽ നാഷണൽ ജിയോഗ്രാഫിക്കിന്റെ പര്യവേക്ഷകനായ റോബർട്ട് ബല്ലാർഡിന്റെയും ഫ്രഞ്ച് സമുദ്രശാസ്ത്രജ്ഞൻ ജീൻ ലൂയിസ് മൈക്കലിന്റെയും പര്യവേഷണത്തിനിടെയാണ് ടൈറ്റാനിക്കിന്റെ അന്ത്യവിശ്രമസ്ഥലം കണ്ടെത്തിയത്. ആളുകളെ ഏറ്റവും കൂടുതൽ വിസ്മയിപ്പിക്കുന്നത് ടൈറ്റാനിക്കിന്റെ ഭീമാകാരമായ വില്ലാണ്.

ഇന്ന്, ടൈറ്റാനിക് തകർന്ന സ്ഥലത്ത് ബിയറും സോഡ കുപ്പികളും ചങ്ങലകളും ചരക്ക് വലകളും ഉൾപ്പെടെയുള്ള മാലിന്യങ്ങൾ നിറഞ്ഞിരിക്കുകയാണെന്ന് നാഷണൽ ജിയോഗ്രാഫിക് പറയുന്നു. സന്ദർശകരും ആ പ്രദേശത്ത് മാലിന്യം തള്ളിയിട്ടുണ്ട്.

ടൈറ്റാനിക് കപ്പൽ അവശേഷിച്ച്‌ കിടക്കുന്ന കൃത്യമായ സ്ഥാനം 1985 ലാണ് കണ്ടെത്തിയത്. അതിനുശേഷം, ടൈറ്റാനിക്കിന്റെ അവശിഷ്ടങ്ങൾ സ്ഥിതി ചെയ്യുന്ന 12,500 അടി താഴ്ചയിലേക്ക് രക്ഷകരും ഗവേഷകരും എത്താറുണ്ട്. വടക്കൻ അറ്റ്‌ലാന്റിക് സമുദ്രത്തിലെ കാനഡയിലെ ന്യൂഫൗണ്ട്‌ലാൻഡിന്റെ തീരത്ത് നിന്ന് ഏകദേശം 600 കിലോമീറ്റർ അകലെയാണ് ഇതിന്റെ അന്ത്യവിശ്രമസ്ഥലം. ഈ കണ്ടെത്തൽ ടൈറ്റാനിക് തകർന്ന സ്ഥലത്ത് നിന്ന് പുരാവസ്തുക്കൾ കണ്ടെടുക്കുന്നതിനുള്ള മത്സരത്തിന് തുടക്കമിട്ടു.

ടൈറ്റാനിക് വെഞ്ച്വേഴ്‌സ് ലിമിറ്റഡ് പാർട്‌ണർഷിപ്പും (ടിവിഎൽപി) L’Institut Français de Recherche pour l’Exploitation de la Mer എന്ന കമ്പനിയും ചേർന്ന് 1800 ഓളം ഇനങ്ങൾ ശേഖരിച്ച് സംരക്ഷിച്ചുവെന്ന് നാഷണൽ ജിയോഗ്രാഫിക് പറയുന്നു. പിന്നീട് കമ്പനി ആർഎംഎസ് ടൈറ്റാനിക് ഇങ്ക് എന്ന് പുനർനാമകരണം ചെയ്തു. കമ്പനി എട്ട് പര്യവേഷണങ്ങൾ കപ്പലിലേക്ക് നടത്തുകയും കപ്പലിൽ നിന്ന് എടുത്ത 5,000-ത്തിലധികം വസ്തുക്കൾ ലേലം ചെയ്യുകയും ചെയ്തു. ഇതിനകം ലേലം ചെയ്തവയിൽ ആഭരണങ്ങളും ടൈറ്റാനിക്കിന്റെ വലിയ ഗോവണിപ്പടിയുടെ ഒരു ഭാഗവും ഉൾപ്പെടുന്നു.

ഇരുണ്ട ആഴങ്ങളിലെ ടൈറ്റാനിക് കാഴ്ചകൾ

1998-ൽ ടൈറ്റാനിക് കാണാനുള്ള യാത്രയ്‌ക്കുള്ള ടിക്കറ്റ് ആദ്യമായി വിറ്റത് ബ്രിട്ടീഷ് സ്ഥാപനമായ ഡീപ് ഓഷ്യൻ എക്‌സ്‌പെഡിഷൻസ് ആയിരുന്നു. ഒരു ടിക്കറ്റിന്റെ വില $32,500 ആയിരുന്നു.

1997-ലെ ബ്ലോക്ക്ബസ്റ്റർ ചിത്രം ടൈറ്റാനിക് സംവിധാനം ചെയ്ത ജെയിംസ് കാമറൂണും ആഴക്കടലിലെ കപ്പൽ തകർന്ന പ്രദേശം സന്ദർശിച്ചിട്ടുണ്ട്.

ഓഷ്യൻഗേറ്റ് പ്രവർത്തിപ്പിക്കുന്ന ടൈറ്റൻ സബ്‌മെർസിബിളിന് 13,000 അടി താഴ്ച വരെ പോകാനാകും.12,500 അടിയോളം താഴ്ചയുള്ള യാത്ര ഏറെ അപകടവും സാഹസികതയും നിറഞ്ഞതാണ്.

ടൈറ്റൻ എങ്ങേനെയാണ് അപകടത്തിലായത്.

നാല് യാത്രക്കാരും ഒരു പൈലറ്റുമായി ആരംഭിച്ച ടൈറ്റൻ യാത്ര ഏറെ ദുഷ്കരമായിരുന്നു. നേരത്തെ 2021 ലും 2022 ലും ഇത് ചെയ്തിട്ടുണ്ട്. ഓഷ്യൻഗേറ്റ് എക്‌സ്‌പെഡിഷൻസ് സിഇഒയും പൈലറ്റുമായ സ്റ്റോക്ക്‌ടൺ റഷ്, ബ്രിട്ടീഷ് ശതകോടീശ്വരൻ പര്യവേക്ഷകൻ ഹാമിഷ് ഹാർഡിംഗ്, ഫ്രഞ്ച് മുങ്ങൽ വിദഗ്ധൻ പോൾ-ഹെൻറി നർജിയോലെറ്റ്, പാകിസ്ഥാൻ വ്യവസായി ഷഹ്‌സാദ ദാവൂദ്, അദ്ദേഹത്തിന്റെ 19 വയസ്സുള്ള മകൻ സുലെമാൻ ദാവൂദ് എന്നിവരാണ് ടൈറ്റനിൽ ഉണ്ടായിരുന്നത്.

സ്വതന്ത്രമായി നാവിഗേറ്റ് ചെയ്യുന്ന അന്തർവാഹിനികളിൽ നിന്ന് വ്യത്യസ്തമായി, മുങ്ങിക്കപ്പലുകൾക്ക് വിക്ഷേപിക്കാനും വീണ്ടെടുക്കാനും ഒരു കപ്പൽ ആവശ്യമാണ്. ഞായറാഴ്ച രാവിലെയാണ് ടൈറ്റൻ കടലിലേക്ക് മുങ്ങിയത്. ടൈറ്റാൻ ടൈറ്റാനിക്കിന് അടുത്തേക്ക് ഏതാണ് ഏകദേശം എട്ട് മണിക്കൂർ എടുക്കും.

ഏകദേശം ഒരു മണിക്കൂറും 45 മിനിറ്റും കഴിഞ്ഞപ്പോൾ ടൈറ്റന് അതിന്റെ ഉപരിതല കപ്പലായ കനേഡിയൻ റിസർച്ച് ഐസ് ബ്രേക്കർ പോളാർ പ്രിൻസുമായുള്ള ബന്ധം നഷ്ടപ്പെട്ടു.

സബ്‌മെർസിബിളിൽ 96 മണിക്കൂർ വരെ എമർജൻസി ഓക്‌സിജൻ ഉണ്ട്. പക്ഷെ അതിന്റെ ഉപയോഗം ഓരോ വ്യക്തിയെ ആശ്രയിച്ചിരിക്കും. സാധാരണയുള്ള ഒരാളുടെ ഓക്‌സിജൻ ഉപയോഗം വ്യായാമം ചെയ്യുന്നവരിൽ നിന്നും പരിഭ്രാന്തരായവരിൽ നിന്നും വ്യത്യസ്തമായിരിക്കും. ടൈറ്റന് എസ്‌കേപ്പ് പോഡ് ഇല്ല. മാത്രവുമല്ല ഹാച്ച് ഉള്ളിൽ നിന്ന് തുറക്കാനും കഴിയില്ല.

യാത്രയ്ക്ക് മുമ്പ് തന്നെ യാത്രക്കാരെ ഇതെല്ലാം അറിയിക്കുകയും ഈ യാത്ര ആരംഭിക്കുന്നതിന് മുമ്പ് അഗ്രിമെന്റിൽ ഒപ്പിടുകയും ചെയ്യും.