ഇക്കുറി ഓണ സദ്യക്കൊപ്പം വിളമ്ബുക ജില്ലയിലെ കുടുംബശ്രീ അംഗങ്ങളുടെ കൈപുണ്യം പതിഞ്ഞ ഉപ്പേരിയും ശര്‍ക്കര വരട്ടിയും
ഇടുക്കി: ഇക്കുറി ഓണ സദ്യക്കൊപ്പം വിളമ്ബുക ജില്ലയിലെ കുടുംബശ്രീ അംഗങ്ങളുടെ കൈപുണ്യം പതിഞ്ഞ ഉപ്പേരിയും ശര്‍ക്കര വരട്ടിയും.
സംസ്ഥാന സര്‍ക്കാര്‍ 14 ഇന ഭക്ഷ്യോത്പന്നങ്ങള്‍ നല്‍കുന്ന ഓണക്കിറ്റില്‍ ഈ വര്‍ഷം കുടുംബശ്രീ ഉത്പന്നങ്ങള്‍ കൂടി ഉള്‍പ്പെടുത്താന്‍ തീരുമാനിച്ചിരുന്നു. ഇതിനായുള്ള 2,32,500 പാക്കറ്റ് ഉപ്പേരിയും ശര്‍ക്കര വരട്ടിയുമാണ് കുടുംബശ്രീ അംഗങ്ങള്‍ തയ്യാറാക്കി നല്‍കുന്നത്. കുടുംബശ്രീ സംരഭങ്ങള്‍ക്കും അയല്‍ക്കൂട്ടങ്ങള്‍ക്കുമാണ് ഉപ്പേരി തയ്യാറാക്കി ഡിപ്പോകളില്‍ എത്തിക്കുന്ന ചുമതല. ഏത്തക്കായ അരിയുന്നത് മുതല്‍ രുചികരമായ ഉപ്പേരിയും ശര്‍ക്കര വരട്ടിയും തയ്യാറാക്കി പായ്ക്ക് ചെയ്യുന്നത് വരെയുള്ള ജോലികള്‍ ഭക്ഷ്യ സുരക്ഷാ മാനദണ്ഡങ്ങള്‍ കൃത്യമായി പാലിച്ചാണ് ചെയ്യുന്നത്. തൊടുപുഴ (84,500), മൂന്നാര്‍ (46,000), നെടുങ്കണ്ടം (1,02,000) എന്നിങ്ങനെ ജില്ലയിലെ സപ്ലൈകോ ഡിപ്പോകളിലേക്കായി 2,32,500 പാക്കറ്റുകളുടെ ഓര്‍ഡറാണ് ഇതുവരെ കുടുംബശ്രീക്ക് ലഭിച്ചത്. കിറ്റുകളില്‍ നിറക്കാന്‍ നൂറ് ഗ്രാം വീതമുള്ള പാക്കറ്റുകളാക്കിയാണ് നല്‍കുന്നത്. ഒരു പാക്കറ്റിന് കുടുംബശ്രീക്ക് 27 രൂപ ലഭിക്കും. സപ്ലൈകോ ഗോഡൗണുകളില്‍ ഉത്പന്നം എത്തിച്ച്‌ കഴിഞ്ഞാല്‍ രണ്ടാഴ്ചയ്ക്കകം പണം നല്‍കാനാണ് തീരുമാനം. ആവശ്യമായ മുഴുവന്‍ ഏത്തക്കായയും കര്‍ഷകരില്‍ നിന്ന് ലഭിക്കാത്തതിനാല്‍ പൊതുവിപണിയെയും ആശ്രയിച്ചിരുന്നു. വരും ദിവസങ്ങളില്‍ കൂടുതല്‍ ഓര്‍ഡറുകള്‍ ലഭിച്ചാല്‍ അവ തയ്യാറാക്കി നല്‍കാനും സജ്ജരാണെന്ന് സംരഭകര്‍ പറഞ്ഞു. കുടുംബശ്രീ ഉത്പന്നങ്ങള്‍ ഓണക്കിറ്റില്‍ ഉള്‍പ്പെടുത്താനുള്ള സര്‍ക്കാര്‍ തീരുമാനത്തിലൂടെ സംരംഭക യൂണിറ്റുകള്‍ക്കും അയല്‍ക്കൂട്ടങ്ങള്‍ക്കും കീഴിലുള്ള നിരവധി കുടുംബങ്ങള്‍ക്കാണ് വരുമാനം ലഭിച്ചത്. വരും വര്‍ഷങ്ങളില്‍ കൂടുതല്‍ കുടുംബശ്രീ ഉല്‍പ്പന്നങ്ങള്‍ ഉള്‍പ്പെടുത്തുമെന്നാണ് ഇവരുടെ പ്രതീക്ഷ.
