മദ്യപിച്ച് ഇലക്ട്രിക് പോസ്റ്റിൽ കാറിടിച്ചുകയറ്റി : പഞ്ചായത്ത് ജീവനക്കാരനെ നാട്ടുകാർ തടഞ്ഞുവെച്ചു

കട്ടപ്പന : വള്ളക്കടവിൽ മദ്യപിച്ച് വാഹനമോടിച്ച് ഇലക്ട്രിക് പോസ്റ്റ് ഇടിച്ചുതകർത്ത പഞ്ചായത്ത് ഓഫീസ് ജീവനക്കാരനെ നാട്ടുകാർ തടഞ്ഞുവെച്ചു. കുമളി പഞ്ചായത്തിലെ ജീവനക്കാരനും തൊപ്പിപ്പാള സ്വദേശിയുമായ ഷിജോ കുര്യനെയാണ് (40) നാട്ടുകാർ തടഞ്ഞുവെച്ചത്.

തിങ്കളാഴ്ച വൈകുന്നേരം വള്ളക്കടവിൽ എത്തിയ ഇയാൾ ഇലക്ട്രിക് പോസ്റ്റിൽ രണ്ടു തവണ കാറിടിപ്പിച്ചെന്ന് ദൃക്സാക്ഷികൾ പറയുന്നു.

തുടർന്ന് സംഭവത്തിന്റെ വീഡിയോദൃശ്യങ്ങൾ സമൂഹമാധ്യമങ്ങളിൽ വൈറലായി. കട്ടപ്പന പോലീസ് സ്ഥലത്തെത്തി മദ്യപിച്ച് വാഹനം ഓടിച്ചതിനും കോവിഡ് പ്രോട്ടോക്കോൾ ലംഘനത്തിനും കേസെടുത്തു.