ഹയർസെക്കണ്ടറി വിദ്യാർത്ഥികളുടെ പാഠപുസ്തകത്തിൽ റോഡ് നിയമങ്ങൾ ഉൾപ്പെടുത്തും

തിരുവനന്തപുരം: ഹയർ സെക്കൻഡറി വിദ്യാർത്ഥികൾക്കിടയിൽ റോഡ് നിയമങ്ങളെക്കുറിച്ച് അവബോധം സൃഷ്ടിക്കുന്നതിന് റോഡ് നിയമങ്ങളും പാഠ്യപദ്ധതിയിൽ ഉൾപ്പെടുത്തും. മോട്ടോർ വാഹന വകുപ്പ് തയ്യാറാക്കിയ പുസ്തകം ഗതാഗത വകുപ്പ് മന്ത്രി ആന്റണി രാജു വിദ്യാഭ്യാസ വകുപ്പ് മന്ത്രി വി. ശിവൻകുട്ടിക്ക് നൽകി സെപ്റ്റംബർ 28 ന് പ്രകാശനം ചെയ്യും. സെക്രട്ടേറിയറ്റിൽ പി.ആർ. ചേംബറിൽ പ്രകാശനച്ചടങ്ങ് നടക്കും.

റോഡ് നിയമങ്ങൾ, മാർക്കിംഗുകൾ, അടയാളങ്ങൾ, വാഹന അപകട കാരണങ്ങൾ, നിയമ പ്രശ്നങ്ങൾ, റോഡ് സുരക്ഷാ സംവിധാനങ്ങൾ എന്നിവയുൾപ്പെടെ മോട്ടോർ വാഹനവുമായി ബന്ധപ്പെട്ട ഡ്രൈവിംഗ് ലൈസൻസ് ലഭിക്കുന്നതിന് മുമ്പ് അറിഞ്ഞിരിക്കേണ്ട കാര്യങ്ങൾ സമഗ്രമായി വിശദീകരിക്കുന്ന ഒരു പുസ്തകം മോട്ടോർ വാഹന വകുപ്പ് തയ്യാറാക്കിയിട്ടുണ്ട്.

പുസ്തകം പാഠ്യപദ്ധതിയിൽ ഉൾപ്പെടുത്തിയിരിക്കുന്നതിനാൽ ഹയർ സെക്കൻഡറി പരീക്ഷ പാസായി ഡ്രൈവിംഗ് ലൈസൻസ് നേടാൻ പ്രായപൂർത്തിയായാൽ ലേണേഴ്സ് ലൈസൻസ് എടുക്കേണ്ടി വരില്ല.  കേന്ദ്ര മോട്ടോർ വാഹന നിയമത്തിൽ ആവശ്യമായ ഭേദഗതികൾ വരുത്താൻ ഗതാഗത വകുപ്പ് നടപടി സ്വീകരിക്കും. രാജ്യത്ത് ആദ്യമായി തയ്യാറാക്കിയ പുസ്തകം പഠിപ്പിക്കാൻ അധ്യാപകർക്ക് പരിശീലനം നൽകാനുള്ള സംവിധാനവും മോട്ടോർ വാഹന വകുപ്പ് ഒരുക്കും.