150 കോടി രൂപ പൊടിച്ചു; ക്രിസ്തുമസിനും റെക്കോര്‍ഡ് മദ്യ വിൽപ്പന
കൊച്ചി: മദ്യമില്ലാത്ത ആഘോഷമുണ്ടോ മലയാളിക്ക്? ക്രിസ്തുമസിന് റെക്കോര്‍ഡ് വിൽപ്പന നേടി ബെവ്കോ. ക്രിസ്തുമസ് ദിനത്തിൽ കേരളത്തിൽ 73 കോടി രൂപയുടെ മദ്യം വിറ്റഴിച്ചു. ബെവ്കോയ്ക്ക് പുറമെ കൺസ്യൂമര്‍ഫെഡ് ഔട്ട്ലൈറ്റുകൾ വഴിയുമുണ്ടായിരുന്നു വിൽപ്പന. ബെവ്കോ ഔട്ട്ലെറ്റ് വഴി 65 കോടി രൂപയുടെ മദ്യവും കൺസ്യൂമര്‍ ഫെഡ് ഔട്ട്ലെറ്റ് വഴി എട്ട്കോടി രൂപയുടെ മദ്യവുമാണ് വിറ്റഴിച്ചത്.
ഡിസംബര്‍ 24-ാം തിയതി കൺസ്യൂമര്‍ ഫെഡ് വഴി 11.5 കോടി രൂപയുടെ മദ്യമാണ് വിറ്റത്. ക്രിസ്തുമസ് തലേന്ന് ബവ്റിജസ് കോര്‍പ്പറേഷൻ 65.88 കോടി രൂപയുടെ മദ്യമാണ് വിറ്റഴിച്ചത്. കഴിഞ്ഞ വര്‍ഷം 55 കോടി രൂപയുടേതായിരുന്നു വിൽപ്പന. തിരുവനന്തപുരം പവര്‍ഹൗസ് ഔട്ട്ലെറ്റിലാണ് ഏറ്റവും കൂടുതൽ വിൽപ്പന നടന്നതെന്ന് റിപ്പോര്‍ട്ടുകൾ സൂചിപ്പിക്കുന്നു. ഇവിടെ മാത്രം 73 ലക്ഷം രൂപയുടെ മദ്യമാണ് വിറ്റഴിച്ചത്.
24-25 ദിവസങ്ങളിലായി 150 കോടി രൂപയിലേറ വരുന്ന മദ്യമാണ് മലയാളികൾ കുടിച്ചത്. തിരുവനന്തപുരം കഴിഞ്ഞാൽ ക്രിസ്തുമസ് ദിനങ്ങളിൽ ഏറ്റവുമധികം വിൽപ്പന നടന്നത് ചാലക്കുടിയിലാണ്. 70.72 ലക്ഷം രൂപയുടെ മദ്യമാണ് ഇവിടെ വിറ്റഴിച്ചത്. പിന്നീട് ഏറ്റവുമധികം വിൽപ്പന നടന്നത് ഇരിങ്ങാലക്കുടയിലാണ്. 63.60 ലക്ഷം രൂപയുടെ മദ്യമാണ് ഇവിടെ മാത്രം വിറ്റഴിച്ചത്.
കഴിഞ്ഞ വര്‍ഷം ബവ്കോഔട്ട്ലെറ്റ് വഴി 55 കോടി രൂപയുടെ മദ്യ വിൽപ്പനയാണ് നടന്നത്. കൊവിഡ് നിയന്ത്രണങ്ങളും മറ്റും മദ്യവിൽപ്പനയെ ബാധിച്ചിരുന്നു. കൺസ്യൂമര്‍ഫെഡ് ഔട്ട്ലെറ്റിലൂടെയുമുണ്ടായിരുന്നു മദ്യ വിൽപ്പന. കൊടുങ്ങല്ലൂരിൽ ആണ് ഏററവുമധികം വിൽപ്പന നടന്നത്. ഇവിടെ മാത്രം 53 ലക്ഷം രൂപയുടെ മദ്യം വിറ്റഴിച്ചു. കൊച്ചി ബാനര്‍ജി റോഡിലെ ഔട്ട്ലെറ്റിൽ 53 ലക്ഷം രൂപയുടെ മദ്യം വിറ്റിരുന്നു.
