കുപ്രസിദ്ധ ഗുണ്ട ടെമ്പർ ബിനുവും സംഘവും വണ്ടിപ്പെരിയാറിൽ അറസ്റ്റിലായി; പ്രതികളെ ആലപ്പുഴ പൊലീസിന് കൈമാറും

കട്ടപ്പന: ആലപ്പുഴ ആര്യാട്ട് യുവാവിനെ വീട്ടിൽക്കയറി ആക്രമിച്ചു കൊലപ്പെടുത്താൻ ശ്രമിച്ച കേസിലെ പ്രതികളായ കുപ്രസിദ്ധ ഗുണ്ടകൾ ഉൾപ്പെടെ 5 പേരെ വണ്ടിപ്പെരിയാർ പൊലീസ് പിടികൂടി. ആര്യാട് കൈതത്തിൽ നികർത്തിൽ എൻ.വിമലിനെ (32) പൂർവവൈരാഗ്യം തീർക്കാൻ 20 നു പുലർച്ചെ വീട്ടിൽക്കയറി വെട്ടിയ കേസിലെ പ്രതികളായ ആലപ്പുഴ പാതിരപ്പള്ളി സ്വദേശി ടെംപർ ബിനു (24), ചേർത്തല സ്വദേശി ഷാനു (23) എന്നിവരെയാണ് പിടികൂടിയത്. ഇവർക്കൊപ്പമുണ്ടായിരുന്ന അനന്തകൃഷ്ണൻ, ഷിനു, പി.കെ.അമൽ എന്നിവരെയും പിടികൂടി. ഇവർ കഞ്ചാവുകടത്ത്, വധശ്രമം ഉൾപ്പെടെയുള്ള കേസിലെ പ്രതികളാണ്. 
ഇടുക്കി ജില്ലാ പൊലീസ് മേധാവിയുടെ നിർദേശപ്രകാരം നടത്തിയ പരിശോധനയിൽ വണ്ടിപ്പെരിയാർ കറുപ്പ് പാലത്തിനു സമീപത്തുനിന്നാണു പ്രതികളെ പിടികൂടിയത്. ആലപ്പുഴ നോർത്ത് സ്റ്റേഷൻ പരിധിയിലെ വിമൽ വധശ്രമക്കേസിലെ പ്രതികൾ സ്റ്റേഷൻ അതിർത്തിയിൽ എത്തിയതായി പൊലീസിനു വിവരം ലഭിച്ചിരുന്നു. തങ്കമല സ്വദേശിയുടെ വീട്ടിൽ ഇവർ ഒളിവിൽ താമസിക്കുകയായിരുന്നു.
മേഖലയിൽ പൊലീസ് വാഹനപരിശോധന കർശനമാക്കിയിരുന്നു. തുടർന്നാണ് പ്രതികളെ കസ്റ്റഡിയിലെടുത്തത്. ഇവരുടെ പക്കൽ നിന്ന് ആയുധങ്ങളും പൊലീസ് പിടിച്ചെടുത്തു. 
ആലപ്പുഴയിൽ എസ്ഡിപിഐ നേതാവിന്റെയും ബിജെപി നേതാവിന്റെയും കൊലപാതകങ്ങളുടെ പശ്ചാത്തലത്തിൽ നിരോധനാജ്ഞ നിലനിൽക്കെയാണ് ആര്യാട്ട് ഇവരുടെ നേതൃത്വത്തിൽ ആക്രമണമുണ്ടായത്. 3 മാസം മുൻപ് ബിനുവിനെയും സഹോദരനെയും വിമലും സംഘവും ആക്രമിച്ചതിലുള്ള വിരോധമാണ് ആക്രമണത്തിനു കാരണം

.