ഹെവന്‍വാലി, മരുതുംപേട്ട മേഖലയില്‍ കന്നുകാലി ശല്യം രൂക്ഷം
കെ. ചപ്പാത്ത്: അയ്യപ്പന്‍കോവില്‍ കെ. ചപ്പാത്ത് പ്രദേശത്ത് കന്നുകാലി ശല്യം രൂക്ഷം. ഹെവന്‍വാലി, മരുതുംപേട്ട മേഖലകളിലാണ് കന്നുകാലികള്‍ കര്‍ഷകര്‍ക്കും താമസക്കാര്‍ക്കും ശല്യമായി തീരുന്നത്. സ്വകാര്യ വ്യക്തികള്‍ മേയാനായി അഴിച്ചു വിടുന്ന കന്നുകാലികളാണ് കൃഷിയിടങ്ങളിലും മറ്റും സ്വൗര്യമായി വിഹരിക്കുന്നത്. കൂട്ടമായും ഒറ്റക്കും എത്തുന്ന കന്നുകാലികളെ കൊണ്ട് പ്രദേശവാസികളും പൊറുതിമുട്ടിയിരിക്കുകയാണ്.
കൃഷിയിടങ്ങളില്‍ കയറുന്ന ഇവ, കര്‍ഷകരുടെ വിളകള്‍ തിന്നു നശിപ്പിക്കുന്നതും പതിവാണ്. ഇതിനു പുറമേ വീടുകളില്‍ വരെ കന്നുകാലികള്‍ കയറി നാശം വിതക്കുന്നത് പതിവായി. സന്ധ്യ കഴിഞ്ഞാല്‍ റോഡുകളും കന്നുകാലികള്‍ കൈയടക്കുന്നതാണ് പതിവ്. രാത്രിയില്‍ ഇതുവഴി വരുന്ന വാഹന യാത്രികര്‍ക്കും ഇവറ്റകള്‍ ഭീതിയായിരിക്കുകയാണ്. നാശം വിതയ്ക്കുന്ന കന്നുകാലികളെ പിടിച്ചു കെട്ടാന്‍ അധികൃതര്‍ തയാറാകണമെന്ന് പ്രദേശവാസികള്‍ ആവശ്യപ്പെട്ടു.
