പെട്ടിമുടി ദുരന്തം നടന്നിട്ട് ഇന്നേക്ക് രണ്ട് വര്‍ഷം
ഇടുക്കി: പെട്ടിമുടി ദുരന്തം നടന്നിട്ട് ഇന്നേക്ക് രണ്ട് വര്‍ഷം. 2020 ആഗസ്റ്റ് ആറിനുണ്ടായ പ്രകൃതിയുടെ സംഹാരതാണ്ഡവത്തില്‍ പൊലിഞ്ഞത് എഴുപത് മനുഷ്യ ജീവനുകളാണ്.
രക്ഷപ്പെട്ടത് 12 പേര്‍, നാല് പേര്‍ ഇന്നും കാണാമറയത്താണ്.
മൂന്നാറില്‍ നിന്ന് 25 കിലോമീറ്റര്‍ ദൂരെ കണ്ണന്‍ ദേവന്‍ കമ്ബനിയുടെ പെട്ടിമുടി തേയില എസ്റ്റേറ്റിലേക്ക് 2020 ആഗസ്ത് ആറാം തീയതി രാത്രി 10.45ന് ഒഴുകിയെത്തിയ ഉരുള്‍ നാല് ലയങ്ങളാണ് തകര്‍ത്തത്. 22 തൊഴിലാളി കുടുംബങ്ങളെയും അവര്‍ ഒരു ജീവിതകാലം കൊണ്ട് സ്വരുക്കൂട്ടിയ സര്‍വ്വതിനെയും ഉരുള്‍ തുടച്ച്‌ നീക്കി. പിറ്റേ ദിവസം പുലര്‍ച്ചെ മാത്രമാണ് ദുരന്തം പുറംലോകം അറിഞ്ഞത്.
തകര്‍ന്ന പെരിയവരൈ പാലം വഴിമുടക്കിയതോടെ രക്ഷാപ്രവര്‍ത്തനവും പ്രതിസന്ധിയിലായി. എന്‍.ഡി.ആര്‍.എഫ് ഉള്‍പ്പടെയുള്ള സേനകള്‍ സ്ഥലത്തെത്തിയപ്പോഴേക്കും ഏറെ വൈകിയിരുന്നു. അപകടത്തില്‍പ്പെട്ട 82 പേരില്‍ പന്ത്രണ്ട് പേരെ മാത്രമാണ് രക്ഷിക്കാനായത്. തെരച്ചില്‍ ആഴ്ചകള്‍ നീണ്ടു. 66 പേരുടെ മൃതദേഹങ്ങള്‍ കണ്ടെത്തിയപ്പോള്‍ നാല് പേര്‍ ഇന്നും മണ്ണിനടിയില്‍ എവിടെയോ ഉണ്ട്.
