കിലോയ്ക്ക് 35 രൂപ വരെ! വലിച്ചെറിയുന്ന ചിരട്ടയ്ക്ക് വിപണിയിൽ ‘തീ വില’; ഇത് അടുക്കളയിലെ കറുത്ത പൊന്ന്
കേരളത്തിലെ ഏതൊരു അടുക്കളയിലും സർവസാധാരണമായി കാണുന്ന ഒന്നാണ് ചിരട്ട. തേങ്ങയുടച്ച് പീര ചിരണ്ടിയെടുത്താൽ പിന്നെ ആ ചിരട്ടയുടെ സ്ഥാനം ഒന്നുകിൽ അടുപ്പിലെ വിറകിനിടയിലാണ്, അല്ലെങ്കിൽ പറമ്പിലെവിടെയെങ്കിലും അവഗണിക്കപ്പെട്ട് കിടക്കും. എന്നാൽ കാലം മാറി, കഥയും മാറി! പ്ലാസ്റ്റിക്കിനെയും കടലാസിനെയും കടത്തിവെട്ടി വിപണി കീഴടക്കുകയാണ് നമ്മുടെ സ്വന്തം ചിരട്ട. ജല ശുദ്ധീകരണം മുതൽ വൻകിട വ്യവസായങ്ങൾ വരെ നീളുന്ന ചിരട്ടയുടെ പുതിയ വിപണിസാധ്യതകളെക്കുറിച്ചും അതിലൂടെ കൈവന്ന വൻ വിലക്കയറ്റത്തെക്കുറിച്ചും ഒരന്വേഷണം.
∙ തലവര മാറിയ ചിരട്ടവിപണി
വെറും രണ്ടു വർഷം മുൻപത്തെ കാര്യമോർത്താൽ മലയാളികൾക്ക് അദ്ഭുതം തോന്നും. അന്ന് ആരെങ്കിലും വന്ന് ചിരട്ട ചോദിച്ചാൽ നമ്മൾ സൗജന്യമായി എടുത്തു കൊടുക്കുമായിരുന്നു. പരമാവധി പോയാൽ കിലോയ്ക്ക് 10 മുതൽ 15 രൂപ വരെ മാത്രം വിലയുണ്ടായിരുന്ന ഒരു കാലം. എന്നാൽ ഇന്ന് സ്ഥിതി തികച്ചും വ്യത്യസ്തം. പഴയ പ്ലാസ്റ്റിക്കും ഇരുമ്പും കടലാസും അന്വേഷിച്ചു വരുന്ന പാഴ്വസ്തു ശേഖരണക്കാർ ഇപ്പോൾ വീട്ടിലെത്തിയാൽ ആദ്യം ചോദിക്കുന്നത് “ചേച്ചീ, ചിരട്ട കൊടുക്കാനുണ്ടോ?” എന്നാണ്.
ഒറ്റയടിക്ക് വിപണിയിൽ ചിരട്ടയുടെ വില മൂന്നിരട്ടിയോളമാണ് വർധിച്ചത്. പച്ചത്തേങ്ങയുടെ വില ഇടിച്ചുതാഴുമ്പോഴും ചിരട്ടയുടെ വില റോക്കറ്റ് പോലെ കുതിക്കുകയാണ്. നിലവിൽ ഒരു കിലോ ചിരട്ടയ്ക്ക് വിപണിയിൽ 32 രൂപ മുതൽ 35 രൂപ വരെ മൊത്തക്കച്ചവടക്കാർ നൽകുന്നുണ്ട്. നാട്ടിൻപുറങ്ങളിലെ ചെറുകിട കച്ചവടക്കാരിൽ നിന്നും തമിഴ്നാട്ടിലെയും കർണാടകയിലെയും വൻകിട മൊത്തക്കച്ചവടക്കാരാണ് പ്രധാനമായും ഈ ചിരട്ടകൾ വൻതോതിൽ ശേഖരിച്ച് അതിർത്തി കടത്തി കൊണ്ടുപോകുന്നത്.
∙ എന്തുകൊണ്ട് ചിരട്ടയ്ക്ക് ഇത്രയേറെ ഡിമാൻഡ്?
നമുക്കിത് വെറുമൊരു അടുപ്പുകത്തിക്കാനുള്ള വസ്തു മാത്രമാണെങ്കിലും, വ്യവസായ ലോകത്ത് ചിരട്ട ഇന്ന് ‘കറുത്ത സ്വർണ’മാണ്. ആഗോളതലത്തിൽ തന്നെ പ്രകൃതിദത്തവും പരിസ്ഥിതിസൗഹൃദവുമായ ഉൽപന്നങ്ങൾക്ക് ആവശ്യക്കാർ ഏറിയതോടെയാണ് ചിരട്ടയുടെ വിപണി മൂല്യം ഉയർന്നത്. ചിരട്ടയ്ക്ക് ഇത്രയും ഡിമാൻഡ് വരാൻ ചില കാരണങ്ങളുണ്ട്.
- ആക്ടിവേറ്റഡ് കാർബൺ നിർമാണം: ചിരട്ടയുടെ ഏറ്റവും വലിയ വ്യവസായ സാധ്യത കിടക്കുന്നത് ആക്ടിവേറ്റഡ് കാർബൺ നിർമാണത്തിലാണ്. ചിരട്ട പ്രത്യേക താപനിലയിൽ കടഞ്ഞെടുക്കുന്ന ഈ കാർബണിന് രാജ്യാന്തര വിപണിയിൽ വൻ വിലയാണുള്ളത്.
- ജല ശുദ്ധീകരണം: ലോകമെമ്പാടും കുടിവെള്ള ശുദ്ധീകരണ ഫിൽറ്ററുകളിൽ വലിയ തോതിൽ ചിരട്ടക്കരി ഉപയോഗിക്കുന്നുണ്ട്. ജലത്തിലെ വിഷാംശങ്ങളെയും ദുർഗന്ധങ്ങളെയും ആഗിരണം ചെയ്യാനുള്ള ഇതിന്റെ ശേഷി അതിശയകരമാണ്. വലിയ വാട്ടർ ട്രീറ്റ്മെന്റ് പ്ലാന്റുകൾ മുതൽ വീട്ടിലെ ചെറിയ ഫിൽറ്ററുകളിൽ വരെ ഇതിന് ആവശ്യക്കാരുണ്ട്.
- സൗന്ദര്യവർധക വസ്തുക്കൾ: സൗന്ദര്യസംരക്ഷണ രംഗത്ത് ഇന്ന് ‘ചാർക്കോൾ ഫേസ് വാഷ്’, ‘ഫേസ് പാക്കുകൾ’, ‘ടൂത്ത് പേസ്റ്റുകൾ’ എന്നിവ വളരെ ജനപ്രിയമാണ്. ഇതിനായി ഉപയോഗിക്കുന്ന ഉയർന്ന ഗുണനിലവാരമുള്ള പ്രകൃതിദത്ത ചാർക്കോൾ നിർമിക്കുന്നത് ചിരട്ടയിൽ നിന്നാണ്.
- ഇതര വ്യവസായങ്ങൾ: കൊതുകുതിരി നിർമാണം, പ്ലൈവുഡ് വ്യവസായത്തിൽ പശ ചേർക്കുന്നതിനുള്ള ഫില്ലറുകൾ, വിദേശ രാജ്യങ്ങളിൽ വലിയ വിപണിയുള്ള ‘ഹുക്ക’ കൽക്കരി എന്നിവയ്ക്കെല്ലാം അസംസ്കൃത വസ്തുവായി കേരളത്തിൽ നിന്നുള്ള കട്ടിയുള്ള, ഗുണനിലവാരമുള്ള ചിരട്ടകൾക്ക് വൻ ആവശ്യക്കാരാണുള്ളത്. പെയിന്റ് നിർമാണ മേഖലയിലും ചിരട്ടപ്പൊടി ഒരു ഘടകമായി ഉപയോഗിക്കുന്നുണ്ട്.
∙ പച്ചത്തേങ്ങയുടെ കണ്ണീരും ചിരട്ടയുടെ ചിരിയും
കേരളത്തിലെ തെങ്ങ് കർഷകർ ഇന്ന് വലിയ പ്രതിസന്ധിയിലൂടെയാണ് കടന്നുപോകുന്നത്. പച്ചത്തേങ്ങയ്ക്ക് വിചാരിച്ച വില കിട്ടാത്തതും, രോഗബാധയും, കൃഷിച്ചെലവ് വർധിച്ചതും കർഷകരെ കണ്ണീരിലാഴ്ത്തുന്നു. എന്നാൽ ഈ പ്രതിസന്ധിക്കിടയിലും കർഷകർക്കും വീട്ടമ്മമാർക്കും ഒരൽപം ആശ്വാസമേകാൻ ചിരട്ട വിപണിക്ക് സാധിക്കുന്നുണ്ട്. മുൻപൊക്കെ തേങ്ങ പൊതിച്ച് കൊപ്രയാക്കുമ്പോൾ ചിരട്ട വെറും പാഴാവുകയായിരുന്നു. എന്നാൽ ഇന്ന് കൊപ്രക്കളങ്ങളിൽ നിന്നും ടൺ കണക്കിന് ചിരട്ടയാണ് തമിഴ്നാട്ടിലെ ഫാക്ടറികളിലേക്ക് കയറ്റിപ്പോകുന്നത്. ഇത് കർഷകർക്ക് ഒരു അധിക വരുമാന മാർഗമായി മാറിയിരിക്കുന്നു.
∙ വീട്ടമ്മമാർക്ക് ഇതൊരു മികച്ച ‘പോക്കറ്റ് മണി’
വലിയ നിക്ഷേപങ്ങളോ അധ്വാനമോ ഇല്ലാതെ തന്നെ സാധാരണക്കാരായ വീട്ടമ്മമാർക്ക് വരുമാനം കണ്ടെത്താനുള്ള ഒരു എളുപ്പവഴിയായി ചിരട്ട ശേഖരണം മാറിയിരിക്കുന്നു. വലിയ സാമ്പത്തിക ലാഭമില്ലാത്തതിനാൽ പ്ലാസ്റ്റിക്കും പേപ്പറും മാറ്റിവെക്കുന്നവർ പോലും ചിരട്ടകൾ ശ്രദ്ധയോടെ മാറ്റിവയ്ക്കാൻ തുടങ്ങിയിട്ടുണ്ട്.
അതേസമയം, ചിരട്ടയ്ക്ക് നല്ല വില ലഭിക്കണമെങ്കിൽ അതിന് കൃത്യമായ ഗുണനിലവാരം ഉണ്ടായിരിക്കണം. തേങ്ങയുടച്ച ശേഷം ചിരട്ട വെറുതെ മുറ്റത്തോ പറമ്പിലോ ഇട്ടാൽ മഴവെള്ളം കയറി അത് ചീഞ്ഞുപോകാൻ സാധ്യതയുണ്ട്. പൂപ്പൽ പിടിച്ച ചിരട്ടകൾക്ക് വിപണിയിൽ വില കുറവായിരിക്കും. അതിനാൽ, തേങ്ങയുടക്കുമ്പോൾ ചിരട്ട വെറുതെ വലിച്ചെറിയുകയോ കത്തിക്കുകയോ ചെയ്യാതെ, അകത്തെ അവശിഷ്ടങ്ങൾ വൃത്തിയാക്കി, മഴ നനയാത്ത ഒരിടത്ത് ചാക്കിൽ ഭദ്രമായി ശേഖരിച്ചു വയ്ക്കുക. 10, 20 കിലോ ആകുമ്പോൾ പാഴ്വസ്തുക്കൾ ശേഖരിക്കുന്നവർക്ക് ഇത് നല്ല വിലയ്ക്ക് കൈമാറാം.
∙ പ്രകൃതിസൗഹൃദ സമ്പദ്വ്യവസ്ഥയിലേക്ക്
പ്ലാസ്റ്റിക് ഉൽപന്നങ്ങൾ ഭൂമിക്ക് വരുത്തിവയ്ക്കുന്ന വിന ചെറുതല്ല. പ്ലാസ്റ്റിക് കപ്പുകൾക്കും പാത്രങ്ങൾക്കും പകരമായി ചിരട്ട കൊണ്ടുള്ള കരകൗശല വസ്തുക്കളും പാത്രങ്ങളും നിർമിക്കുന്ന ചെറുകിട വ്യവസായങ്ങളും കേരളത്തിൽ പച്ചപിടിക്കുന്നുണ്ട്. പ്രകൃതിയിൽ നിന്ന് ലഭിക്കുന്ന ഒരു വസ്തുവും പാഴാക്കാനില്ലെന്നും, ശരിയായി വിനിയോഗിച്ചാൽ അതിനെ സമ്പത്താക്കി മാറ്റാമെന്നും ചിരട്ട വിപണി നമ്മെ പഠിപ്പിക്കുന്നു.
നമ്മുടെ അടുക്കളകളിൽ ജനിക്കുന്ന ഈ ‘കറുത്ത സ്വർണം’ ഇന്ന് തമിഴ്നാട്ടിലെയും കർണാടകയിലെയും ഫാക്ടറികളിൽ എത്തി വലിയ വ്യവസായങ്ങൾക്ക് കരുത്തുപകരുമ്പോൾ, മലയാളിക്ക് അതൊരു പുത്തൻ വരുമാന സാധ്യതയുടെ വാതിലാണ് തുറന്നിടുന്നത്. അതുകൊണ്ട്, ഇനിമുതൽ അടുക്കളയിൽ തേങ്ങയുടക്കുമ്പോൾ ഓർക്കുക- നിങ്ങൾ ഉടയ്ക്കുന്നത് വെറുമൊരു തേങ്ങയല്ല, നാളെയുടെ പോക്കറ്റ് മണി കൂടിയാണ്!
