വനത്തില്‍ വഴിതെറ്റിപ്പോയ യുവാവിനെ കണ്ടെത്തി
വനത്തില്‍ വഴിതെറ്റിപ്പോയ യുവാവിനെ കണ്ടെത്തി….വാഴത്തോപ്പ് പഞ്ചായത്തിലെ ആനക്കൊമ്ബന്‍ വ്യൂ പോയിന്റ് കാണാനെത്തിയ യുവാവിനാണ് വഴി തെറ്റിപ്പോയത്
വനത്തില്‍ വഴിതെറ്റിപ്പോയ യുവാവിനെ മലയിഞ്ചിയില്‍ നിന്ന് കണ്ടെത്തി. വാഴത്തോപ്പ് പഞ്ചായത്തിലെ ആനക്കൊമ്ബന്‍ വ്യൂ പോയിന്റ് കാണാനായി എത്തിയ ഉപ്പുതോട് ന്യൂ മൗണ്ട് സ്വദേശി കാരഞ്ചിയില്‍ ജോമോന് ജോസഫിനെ (34) ആണ് കാണാതായത്. ജോമോനൊടൊപ്പമുണ്ടായിരുന്ന വെള്ളക്കല്ലുങ്കല്‍ അനീഷ് ദാസ് (30) അറിയിച്ചതനുസരിച്ച്‌ ഇടുക്കി പോലീസും നാട്ടുകാരും തിരച്ചില്‍ തുടങ്ങി.
വെള്ളിയാഴ്ച ഉച്ചകഴിഞ്ഞാണ് രണ്ടു യുവാക്കളും ആനക്കൊമ്ബന്‍ പാറക്കെട്ടില്‍ കയറാന്‍ കാട്ടിലേക്കുപോയത്. ഇവിടെ വെച്ച്‌ ജോമോനെ കാണാതായപ്പോള്‍ അനീഷ് ദാസ് തിരികെയെത്തി നാട്ടുകാരെയും ബന്ധുക്കളെയും അറിയിക്കുകയായിരുന്നു.
കാട്ടില്‍ ഇരുവരും രണ്ട് വഴിക്കായി പിരിഞ്ഞ് സഞ്ചരിക്കവെ ജോമോന് വഴിതെറ്റി. ഇതിനിടെ ഫോണ്‍ ഓഫാകുകയും ചെയ്തു. മണിക്കൂറുകള്‍ അലഞ്ഞുനടന്ന ഇയാള്‍ പിന്നീട് മലയിഞ്ചിയില്‍ ചെന്നെത്തി. മലയിഞ്ചിയിലെത്തി ഫോണ്‍ ചാര്‍ജുചെയ്ത ശേഷം സുഹൃത്തിനെ വിളിച്ചു വിവരം അറിയിച്ചതിനെ തുടര്‍ന്ന് ഇടുക്കിയില്‍നിന്ന് പോലീസെത്തി ഇടുക്കി സ്റ്റേഷനില്‍ കൊണ്ടുവന്ന് മൊഴി രേഖപ്പെടുത്തി. ഇയാളെ നെടുങ്കണ്ടം കോടതിയില്‍ ഹാജരാക്കും.
