പട്ടികജാതി, പട്ടിക വര്‍ഗ വിഭാഗക്കാര്‍ക്ക് ക്ഷേത്രപ്രവേശനം സാദ്ധ്യമാക്കി രണ്ട് വനിതാ സിവില്‍ സര്‍വീസ് ഉദ്യോഗസ്ഥര്‍
ചെന്നൈ: പട്ടികജാതി, പട്ടിക വര്‍ഗ വിഭാഗക്കാര്‍ക്ക് ക്ഷേത്രപ്രവേശനം സാദ്ധ്യമാക്കി രണ്ട് വനിതാ സിവില്‍ സര്‍വീസ് ഉദ്യോഗസ്ഥര്‍.
തമിഴ്നാട്ടിലെ പുതുക്കോട്ടയിലെ വേങ്ങവയല്‍ ഗ്രാമത്തിലാണ് സംഭവം. പ്രദേശത്തെ അയ്യനാര്‍ ക്ഷേത്രത്തില്‍ പതിറ്റാണ്ടുകളായി ദളിതര്‍ക്ക് പ്രവേശനമില്ലായിരുന്നു.
ജനപ്രതിനിധകള്‍ വര്‍ഷങ്ങളായി ശ്രമിച്ചിട്ടും മാറ്റാന്‍ കഴിയാത്ത അയിത്തമാണ് നിമിഷനേരം കൊണ്ട് പുതുക്കോട്ട കളക്ടര്‍ കവിത രാമുവും, എസ് പി വന്ദിത പാണ്ഡേയും ചേര്‍ന്ന് മാറ്റിയത്. ഗ്രാമത്തിലെ എസ് സി, എസ് ടി കോളനിക്കാര്‍ക്കുള്ള കുടിവെള്ള ടാങ്കില്‍ അജ്ഞാതര്‍ മലം കലര്‍ത്തിയത് അന്വേഷിക്കാനെത്തിയതായിരുന്നു ഉദ്യോഗസ്ഥര്‍.
നാട്ടുകാരോട് പ്രശ്നങ്ങള്‍ ചോദിച്ചറിയുന്നതിനിടയിലാണ് ഒരു പെണ്‍കുട്ടി ക്ഷേത്രത്തില്‍ പ്രവേശനം അനുവദിക്കുന്നില്ലെന്ന് അറിയിച്ചത്. തുടര്‍ന്ന് ഭാരവാഹികളെ വിളിപ്പിച്ച്‌ ക്ഷേത്രം തുറപ്പിച്ച്‌ എല്ലാവര്‍ക്കും പ്രവേശനം നല്‍കി. ഭാരവാഹികള്‍ക്കെതിരെ എസ് സി, എസ് ടി പീഡന നിരോധന നിയമപ്രകാരം കേസെടുത്തിട്ടുണ്ട്.
