ചായക്കപ്പിൽ വീണുപോയ ബിസ്ക്കറ്റ്; ചായയിൽ ബ്രഡും ബിസ്ക്കറ്റും മുക്കി കഴിക്കുന്ന ശീലം എങ്ങനെ വന്നു?
ഒരു കപ്പ് ചായയും അതിനൊപ്പം രണ്ടോ മൂന്നോ ബിസ്ക്കറ്റും. പലരുടെയും പ്രഭാതത്തിന്റെയും വൈകുന്നേരത്തിന്റെയും സ്ഥിരം ശീലമാണത്. ചായയില് ബിസ്ക്കറ്റ് ഒന്ന് മുക്കി, അല്പം മൃദുവായ ശേഷം കഴിക്കുന്നത് മിക്കവര്ക്കും വലിയ ഇഷ്ടമാണ്. ചിലരാകട്ടെ ബ്രെഡും ചായയില് മുക്കി കഴിക്കും. എന്നാല് ചായയില് ബിസ്ക്കറ്റ് മുക്കി കഴിക്കുന്ന ഈ ശീലം എവിടുന്ന് എങ്ങനെയാണ് തുടങ്ങിയത്? എന്തുകൊണ്ടാണ് വെറുതെ കഴിക്കാതെ ബിസ്കറ്റും ബ്രഡും ചായയില് മുക്കുന്നത്? ഇതിന് പിന്നില് നൂറ്റാണ്ടുകള് പഴക്കമുള്ള ഒരു കഥയുണ്ട്.
ചായയും ബിസ്ക്കറ്റും ഒന്നിക്കുന്നത് ഇങ്ങനെയാണ്
യൂറോപ്പില് ചായ ജനപ്രിയമായ കാലത്താണ് ചായയ്ക്കൊപ്പം ചെറിയ പലഹാരങ്ങള് കഴിക്കുന്ന ശീലം വളര്ന്നത്. ബ്രെഡും ഉണക്ക ബിസ്ക്കറ്റുകളും അന്ന് സാധാരണ ഭക്ഷണങ്ങളായിരുന്നു. പിന്നീട് ബ്രിട്ടനില് ‘ആഫ്റ്റര്നൂണ് ടീ’ എന്ന സംസ്കാരം വളര്ന്നു. ഉച്ചഭക്ഷണത്തിനും അത്താഴത്തിനും ഇടയില് ഉണ്ടാകുന്ന ചെറിയ വിശപ്പ് മാറ്റാന് ചായയ്ക്കൊപ്പം ബ്രെഡ്, കേക്ക്, ബിസ്ക്കറ്റ് തുടങ്ങിയവ കഴിക്കുന്ന രീതിയായിരുന്നു ഇത്. അങ്ങനെ ചായയും ചെറിയ പലഹാരങ്ങളും തമ്മിലുള്ള ബന്ധം കൂടുതല് ശക്തമായി.
ചായയില് മുക്കി കഴിക്കുന്ന ശീലം എവിടെനിന്ന് വന്നു
ഈ ശീലത്തിന് പിന്നില് ഒരു കാരണമുണ്ട്. പണ്ടുകാലത്തെ എല്ലാ ബിസ്ക്കറ്റുകളും ഇന്നത്തെ പോലെ മൃദുവായിരുന്നില്ല. ദീര്ഘകാലം കേടാകാതെ സൂക്ഷിക്കാനായി ഉണ്ടാക്കിയിരുന്ന ചില ബിസ്ക്കറ്റുകള് വളരെ കട്ടിയുള്ളതായിരുന്നു. പ്രത്യേകിച്ച് കടല്യാത്ര നടത്തുന്ന നാവികര്ക്കും സൈനികര്ക്കും ഇത്തരം ഉണക്ക ഭക്ഷണങ്ങള് നല്കിയിരുന്നു. വെള്ളത്തിന്റെ അളവ് കുറവായതിനാല് അവ ഏറെക്കാലം സൂക്ഷിക്കാനാകുമായിരുന്നു. എന്നാല് കഴിക്കാന് ബുദ്ധിമുട്ടുമായിരുന്നു. അങ്ങനെയാണ് അവ വെള്ളത്തിലോ ചൂടുള്ള പാനീയങ്ങളിലോ മുക്കി മൃദുവാക്കിയ ശേഷം കഴിക്കുന്ന രീതിയുണ്ടായത്.
ചായയില് മുക്കുമ്പോള് ബിസ്ക്കറ്റിന് രുചി കൂടും
ബിസ്ക്കറ്റ് ചായയില് മുക്കുമ്പോള് ചൂടുള്ള ചായ അത് വലിച്ചെടുക്കുന്നു. ഇതോടെ ബിസ്ക്കറ്റ് മൃദുവാകും. വരണ്ട ബിസ്ക്കറ്റിന് പകരം ചായയുംകൂടിച്ചേര്ന്ന് മൃദുവാകുമ്പോള് രുചി വര്ധിക്കും. അതുകൊണ്ടാണ് പലര്ക്കും ചായയില് മുക്കിയ ബിസ്ക്കറ്റ് സാധാരണ ബിസ്ക്കറ്റിനേക്കാള് രുചികരമായി തോന്നുന്നത്.
ഇന്ത്യയില് ഈ ശീലം എങ്ങനെ വന്നു?
ഇന്ത്യയില് ചായ ജനപ്രിയമായതില് ബ്രിട്ടീഷ് കാലഘട്ടത്തിന് വലിയ പങ്കുണ്ട്. പിന്നീട് ചായ പതിയെ ഇന്ത്യക്കാരുടെ ദൈനംദിന ജീവിതത്തിന്റെ ഭാഗമായിത്തീര്ന്നു. ചായയുടെ ഉപയോഗം വര്ധിപ്പിക്കാന് തേയില വ്യവസായവും വര്ധിച്ചു.അങ്ങനെ ചായ സാധാരണമായി. ചായ എളുപ്പത്തില് ലഭിക്കാന് തുടങ്ങിയതോടെ അതിനൊപ്പം കഴിക്കുന്ന ബ്രെഡും ബിസ്ക്കറ്റും പോലുള്ള ലഘുഭക്ഷണങ്ങളും ജനപ്രിയമായി. ബേക്കറികള് വ്യാപകമായതോടെ ബ്രെഡും ബിസ്ക്കറ്റും സാധാരണക്കാരുടെ വീടുകളിലും എളുപ്പത്തില് ലഭിച്ചു. അങ്ങനെ പതിയെ ചായ + ബിസ്ക്കറ്റ് കൂട്ടുകെട്ട് ഇന്ത്യന് വീടുകളിലും ചായക്കടകളിലുംമെല്ലാം സ്ഥിരം കാഴ്ചയായി.
ബ്രെഡും ചായയില് മുക്കുന്നത് എന്തുകൊണ്ട്?
ബിസ്ക്കറ്റിനെ പോലെ ബ്രെഡും ചായയില് മുക്കുമ്പോള് മൃദുവാകും. ചായയുടെ രുചിയും ബ്രെഡിലേക്ക് എത്തും. പ്രത്യേകിച്ച് ലളിതമായ ഭക്ഷണം കഴിക്കാന് ആഗ്രഹിക്കുന്നവര്ക്ക് ചായയും ബ്രെഡും എളുപ്പമുള്ള ഒരു കൂട്ടുകെട്ടാണ്. ഇന്ന് പലതരം സ്നാക്സുകള് ലഭ്യമാണെങ്കിലും ചായയില് ബ്രെഡ് മുക്കി കഴിക്കുന്ന ശീലം ഇപ്പോഴും പല വീടുകളിലും കാണാം.
വെറുമൊരു ഭക്ഷണശീലമല്ല…
ഇന്ന് കഫേകളില് ചായയ്ക്കൊപ്പം മഫിന്, കുക്കീസ് തുടങ്ങി നിരവധി പലഹാരങ്ങളുണ്ട്. എന്നിട്ടും സാധാരണ ചായക്കൊപ്പം ഒരു ബിസ്ക്കറ്റ് മുക്കിക്കഴിക്കുന്ന ശീലം മാറിയിട്ടില്ല. രാവിലെ തിരക്കിനിടയിലെ ചെറിയ ഇടവേളയായാലും വൈകുന്നേരത്തെ വിശ്രമമായാലും ചായയില് മുക്കിയ ഒരു ബിസ്ക്കറ്റിന് പലരുടെയും ജീവിതത്തില് ഒരു പ്രത്യേക സ്ഥാനമുണ്ട്.
