അതീവ സുരക്ഷയുള്ള വോട്ടെണ്ണല്‍ കേന്ദ്രം : നെടുങ്കണ്ടം സെന്റ് സെബാസ്റ്റിയന്‍സ് സ്കൂളും !
ഇടുക്കി : ഉടുമ്പന്‍ചോല മണ്ഡലത്തിലെ വോട്ടെണ്ണുന്ന നെടുങ്കണ്ടം സെന്റ് സെബാസ്റ്റിയന്‍സ് സ്‌കൂള്‍ അതീവ സുരക്ഷയുള്ള വോട്ടെണ്ണല്‍ കേന്ദ്രം. സ്‌കൂളിലെ സ്‌ട്രോങ് റൂമുകള്‍ക്ക് സുരക്ഷ വര്‍ധിപ്പിച്ചു. സെന്റ് സെബാസ്റ്റിയന്‍സ് സ്‌കൂളില്‍ ആറ് സ്‌ട്രോങ് റൂമുകളാണുള്ളത്. ഒന്നില്‍ പോസ്റ്റല്‍ ബാലറ്റുകള്‍, മറ്റൊന്നില്‍ സ്‌പെയര്‍ വോട്ടിങ് മെഷിനുകള്‍ എന്നിങ്ങനെയാണ് സൂക്ഷിച്ചിരിക്കുന്നത്. സുരക്ഷക്കായി നാല് തരത്തിലാണ് ഉദ്യോഗസ്ഥരെ വിന്യസിച്ചിരിക്കുന്നത്. കേന്ദ്ര സേനയുടെ 18 അംഗ സംഘമാണ് സ്‌ട്രോങ് റൂമിന് കാവല്‍ നില്‍ക്കുന്നത്. ഏട്ടംഗ ആര്‍മ്ഡ് പോലീസ് ഉദ്യോഗസ്ഥരും സ്ഥലത്തുണ്ട്. ഇതിന് പുറമെ പോലീസ് വാഹനത്തില്‍ എസ്.ഐയുടെ നേതൃത്വത്തിലുള്ള സംഘം പുറത്തു കാവലുണ്ട്. സ്‌ട്രോങ് റൂം നിരീക്ഷണത്തിനു സി.സി ടി.വി കണ്‍ട്രോള്‍ റൂമും സ്ഥാപിച്ചു. കട്ടപ്പന സബ് ഡിവിഷന് കീഴിലുള്ള ഒരോ എസ്.ഐമാര്‍ക്കും ഒന്നിടവിട്ട ദിവസങ്ങളില്‍ സുരക്ഷ നല്‍കാന്‍ എത്തണം. അഡീഷണല്‍ തഹസില്‍ദാരുടെ നേതൃത്വത്തിലുള്ള സംഘം 24 മണിക്കൂറും ക്യാമ്പ് ചെയ്യുന്നുണ്ട്. ഉടുമ്പന്‍ചോല തഹസില്‍ദാര്‍ നിജു കുര്യനാണ് സുരക്ഷക്ക് മേല്‍നോട്ടം വഹിക്കുന്നത്.
