സര്‍ക്കാര്‍ ആശുപത്രികള്‍ രോഗി ജനസൗഹൃദമാക്കുകയാണ് ലക്ഷ്യമെന്ന് മന്ത്രി വീണ ജോര്‍ജ്
സര്‍ക്കാര്‍ ആശുപത്രികളെ ജനങ്ങള്‍ ഏറ്റവും കൂടുതല്‍ ആശ്രയിക്കുന്ന സാഹചര്യത്തില്‍ ഓരോ സര്‍ക്കാര്‍ ആശുപത്രികളും രോഗി ജനസൗഹൃദമാക്കുക എന്നതാണ് പ്രധാന ലക്ഷ്യമെന്ന് മന്ത്രി വീണ ജോര്‍ജ് പറഞ്ഞു.ആര്‍ദ്രം മിഷനില്‍ ഉള്‍പ്പെടുത്തി മലമ്ബുഴ പ്രാഥമികാരോഗ്യ കേന്ദ്രം കുടുംബാരോഗ്യ കേന്ദ്രമായി ഉയര്‍ത്തുന്നതിന്റെ ഉദ്ഘാടനം നിര്‍വഹിക്കുകയായിരുന്നു മന്ത്രി.ആശുപത്രിയുടെ ഗേറ്റ് മുതല്‍ എല്ലാ രംഗത്തും സൗഹൃദ അന്തരീക്ഷം ഉറപ്പുവരുത്തും.
ആശുപത്രിയിലെ ചികിത്സ പരമാവധി സൗജന്യവും മിതമായ നിരക്കിലും നല്‍കാനാണ് ശ്രമം നടക്കുന്നതെന്നും . അവയവമാറ്റ രംഗത്ത് സര്‍ക്കാര്‍ സജീവമായ ഇടപെടലാണ് നടത്തുന്നത്. ചെലവേറിയ ലിവര്‍ ട്രാന്‍സ്‌പ്ലാന്റേഷന്‍ സര്‍ക്കാര്‍ ആശുപത്രികളില്‍ കുറഞ്ഞ ചിലവില്‍ നടത്തുന്നതിനുള്ള നടപടികള്‍ തുടങ്ങി കഴിഞ്ഞു. ആദിവാസി മേഖലകള്‍ ഉള്ളതുകൊണ്ട് പാലക്കാട് ജില്ലയ്ക്കും പ്രത്യേകിച്ച്‌ മലമ്ബുഴ മണ്ഡലത്തിനും വലിയ പ്രാധാന്യമാണ് ആരോഗ്യവകുപ്പ് നല്‍കുന്നത്. രാജ്യത്ത് നവജാത ശിശുമരണം ഏറ്റവും കുറവുള്ളത് കേരളത്തിലാണ്. മാതൃ മരണനിരക്ക് കുറയ്ക്കുക ലക്ഷ്യമാണെന്നും മന്ത്രി പറഞ്ഞു. മലമ്ബുഴ പ്രാഥമികാരോഗ്യ കേന്ദ്രത്തില്‍ മികച്ച ഇടപെടല്‍ നടത്തുന്ന ഡോ. ജയപ്രസാദിനെ മന്ത്രി അഭിനന്ദിച്ചു.
എ. പ്രഭാകരന്‍ എം.എല്‍.എ അദ്ധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് കെ. ബിനുമോള്‍ മുഖ്യാതിഥിയായി. ഡി.പി.എം പാലക്കാട് ഡോക്ടര്‍ ടി.വി. റോഷ് റിപ്പോര്‍ട്ട് അവതരിപ്പിച്ചു. ജില്ലാ മെഡിക്കല്‍ ഓഫീസര്‍ ഡോ. കെ.പി. റീത്ത പദ്ധതി വിശദീകരിച്ചു. ബ്ലോക്ക് പഞ്ചായത്ത് പ്രസിഡന്റ് വി. ബിനോയി, തോമസ് വാഴപ്പള്ളി, ബി. ബിനോയ് അഞ്ചു ജയന്‍, എസ്. സുജാത, രാധിക മാധവന്‍, ടി.കെ. ജയപ്രസാദ് എന്നിവര്‍ പങ്കെടുത്തു.
