മൂന്ന് ഷട്ടർ തുറന്നിട്ടും മുല്ലപ്പെരിയാറിൽ ജലനിരപ്പ് താഴ്ന്നില്ല; രാവിലെ 138.85 അടി.

ഷട്ടറുകൾ ഉയർത്തിയിട്ടും മുല്ലപ്പെരിയാർ അണക്കെട്ടിലെ ജലനിരപ്പ് 138 അടിയിലേക്ക് നിജപ്പെടുത്താൻ ആയില്ല. രാത്രിയിൽ മൂന്നാമത്തെ ഷട്ടർ കൂടി ഉയർത്തി അധികജലം പുറത്തേക്കൊഴുക്കുകയാണ്. നിലവിൽ 3 ഷട്ടറുകൾ 30 സെൻറീമീറ്റർ വീതം ഉയർത്തി സെക്കൻഡിൽ 825 ഘനയടി വെള്ളമാണ് ഒഴുക്കുന്നത്.

കേരളത്തിന്റെ നിർബന്ധപ്രകാരമാണ് മൂന്നാമത്തെ ഷട്ടർ ഉയർത്താൻ തമിഴ്നാട് തയ്യാറായത്. ഷട്ടറുകൾ ഉയർത്തിയിട്ടും ജലനിരപ്പ് 138.85 അടിയായി തുടരുകയാണ്. റൂൾ കർവ് പ്രകാരം 138 അടിയാണ് അനുവദീയ പരമാവധി സംഭരണ ശേഷി. സ്ഥിതിഗതികൾ വിലയിരുത്താൻ മന്ത്രി റോഷി അഗസ്റ്റിൻ തേക്കടിയിൽ ക്യാംപ് ചെയ്യുകയാണ്.