നാട്ടുവാര്‍ത്തകള്‍
ഏലത്തട്ടകള്‍ മോഷണം പോയി
കട്ടപ്പന: ഏലത്തട്ടകള്‍ മോഷണം പോയതായി പരാതി. പോലീസ് അന്വേഷണം ആരംഭിച്ചു. റെജി ഞള്ളാനിയുടെ നരിയംപാറയിലുള്ള ഏലത്തോട്ടത്തില്‍നിന്നുമാണ് ഇരുപത്തയ്യായിരത്തിലധികം രൂപ വിലവരുന്ന ഏലത്തട്ടകള്‍ മോഷണം പോയത്. നരിയംപാറ പ്രദേശം കേന്ദ്രീകരിച്ച് മോഷണശല്യം വര്‍ധിച്ചുവരികയാണ്. പ്രദേശവാസികളുടെ വാഴക്കുലകളും ഏലക്കയും വളര്‍ത്തുമത്സ്യങ്ങളും കുരുമുളകും കാപ്പിക്കുരുവും മറ്റും മോഷ്ടിക്കപ്പെടുന്നുണ്ട്. നരിയംപാറ സാംസ്‌കാരികനിലയം റോഡ് കേന്ദ്രീകരിച്ച് സാമൂഹികവിരുദ്ധരും മദ്യപിക്കുന്നവരും സംഘം ചേരുക പതിവായിട്ടുണ്ട് . മേഖല കേന്ദ്രീകരിച്ച് പോലീസിന്റെ പട്രോളിങ് ആവശ്യമാണ്. നരിയംപാറ സാംസ്‌കാരികനിലയം റോഡ് കേന്ദ്രീകരിച്ച് പോലീസിന്റെ പ്രത്യേക ശ്രദ്ധയുണ്ടാവണമെന്നും മോഷ്ടാക്കളെ എത്രയും വേഗം കസ്റ്റ്ഡിയിലെടുക്കണമെന്നും നാട്ടുകാര്‍ ആവശ്യപ്പെട്ടു.
