പാര്‍ക്ക് ചെയ്യുന്ന വാഹനങ്ങള്‍ കത്തിക്കുന്ന സംഘം വ്യാപകം
നെടുങ്കണ്ടം: മേഖലയില്‍ വീടിനു സമീപത്ത് പാര്‍ക്ക് ചെയ്യുന്ന വാഹനങ്ങള്‍ കത്തിക്കുന്ന സംഘം വ്യാപകമായതോടെ ഭീതിയില്‍ വാഹന ഉടമകള്‍. ഇന്നലെ പുലര്‍ച്ചെ മാവടിയില്‍ വീടിനു സമീപം പാര്‍ക്ക് ചെയ്തിരുന്ന ബൈക്കാണ് കത്തിച്ചത്. രണ്ട് മാസം മുന്‍പും മാവടിയില്‍ റോഡരുകില്‍ പാര്‍ക്ക് ചെയ്തിരുന്ന രണ്ട് ബൈക്കുകള്‍ കത്തിച്ചിരുന്നു. ഫയര്‍ഫോഴ്‌സ് എത്തിയാണ് തീയണച്ചത്. ഇന്നലെ മാവടി കാലക്കാട് റാണിവിലാസം ശശികുമാറിന്റെ പള്‍സര്‍ ബൈക്കാണ് കത്തിച്ചത്. ഇയാളുടെ പിതാവ് ഗുരുസ്വാമിയുടെ പേരിലുള്ള വാഹനം
രാത്രി 12.30ഓടെ കത്തിക്കുകയായിരുന്നു. ബൈക്കില്‍ പെട്രോള്‍ ഒഴിച്ച ശേഷം കുറച്ചു ദൂരത്തില്‍ പെട്രോള്‍ ഒഴിച്ചു. ശേഷം തീയിടുകയായിരുന്നു. തീ കത്തുന്ന ശബ്ദം കേട്ട് വീട്ടുകാര്‍ ഉന്നര്‍ന്നപ്പോഴേക്കും ബൈക്ക് ഏതാണ്ട് പൂര്‍ണമായും നശിച്ചു. പരാതിയെ തുടര്‍ന്നു നെടുങ്കണ്ടം പോലീസ് കേസെടുത്ത് അനേ്വഷണം തുടങ്ങി.
