ഇസ്രയേലിന്റെ മിസൈല് ആക്രമണത്തില് മാധ്യമപ്രവര്ത്തകന് കൊല്ലപ്പെട്ടു
ഇസ്രയേലിന്റെ മിസൈല് ആക്രമണത്തില് മാധ്യമപ്രവര്ത്തകന് കൊല്ലപ്പെട്ടു. തെക്കന് ലെബനന് അതിര്ത്തിയിലുണ്ടായ വ്യോമാക്രമണത്തില് റോയിട്ടേഴ്സ് മാധ്യമപ്രവര്ത്തകന് ഇസാം അബ്ദുള്ളയാണ് കൊല്ലപ്പെട്ടത്. ആക്രമണത്തില് അല് ജസീറ മാധ്യമപ്രവര്ത്തകനും ക്യാമറാമാനും പരുക്കേറ്റു. വീഡിയോഗ്രാഫറായ ഇസ്സാം അബ്ദല്ല ആക്രമണത്തില് കൊല്ലപ്പെട്ടതായി റോയിട്ടേഴ്സ് വാര്ത്താ ഏജന്സി സ്ഥിരീകരിച്ചു. കൂടുതല് വിവരങ്ങള് തേടുകയാണെന്നും ഇസ്സാമിന്റെ കുടുംബത്തെയും സഹപ്രവര്ത്തകരെയും പിന്തുണയ്ക്കുന്നുവെന്നും റോയിട്ടേഴ്സ് പ്രസ്താവനയില് പറഞ്ഞു. ക്യാമറാ പേഴ്സണ് എലി ബ്രാഖ്യയും റിപ്പോര്ട്ടര് കാര്മെന് ജൗഖാദറും പരുക്കേറ്റ മാധ്യമപ്രവര്ത്തകരില് ഉള്പ്പെടുന്നുവെന്ന് അല് ജസീറയും സ്ഥിരീകരിച്ചു.
റിപ്പോര്ട്ടുകളനുസരിച്ച് ഇസ്രായേല്-ഹമാസ് യുദ്ധം ആരംഭിച്ച ശേഷം ഗാസയില് കുറഞ്ഞത് ആറ് മാധ്യമപ്രവര്ത്തകരെങ്കിലും കൊല്ലപ്പെട്ടിട്ടുണ്ട്. ചൊവ്വാഴ്ച നടന്ന വ്യോമാക്രമണത്തില് സയീദ് അല് തവീല്, മുഹമ്മദ് സുബ്, ഹിഷാം അല്ന്വാജ എന്നിവരാണ് കൊല്ലപ്പെട്ടത്.
