ഇടുക്കി പീരുമേട്ടിൽ ദേവാലയത്തിൽ മോഷണം; നേർച്ചപ്പെട്ടി കുത്തിത്തുറന്ന് പണം കവർന്നു

പീരുമേട് സെന്റ് തോമസ് ഓർത്തഡോക്സ് സിറിയൻ ദേവാലയത്തിൽ മോഷണം. കഴിഞ്ഞ രാത്രിയിലാണ് നേർച്ച പെട്ടിതകർത്ത് മോഷ്ടാക്കൾ പണം അപഹരിച്ചത്. രാവിലെ കുരിശടിയിൽ പ്രാർത്ഥിക്കാൻ എത്തിയ ആളുകളാണ് നേർച്ചപ്പെട്ടി തകർത്തതായി കണ്ടത്ത്. തുടർന്ന് നടത്തിയ പരിശോധനയിൽ ദേവാലയത്തിന്റെ പിൻവാതിൽ തകർത്തതായും പള്ളിക്കുള്ളിൽ സ്ഥാപിച്ചിരുന്ന നേർച്ച പെട്ടി തകർത്ത് പണം അപഹരിച്ചതായും കണ്ടെത്തി. അതേസമയം മുൻപും ദേവാലയത്തിൽ മോഷണശ്രമം നടന്നതായി ദേവാലയ അധികൃതർ വ്യക്തമാക്കി. സംഭവത്തിൽ പീരുമേട് പോലീസ് കേസെടുത്ത് അന്വേഷണം ആരംഭിച്ചു.