കൊച്ചുതോവാള കൊലപാതകം !കൊലയാളി ഇപ്പോഴും കാണാമറയത്ത്; ഇരുട്ടിൽ തപ്പി പോലീസ്

കട്ടപ്പന: കൊച്ചുതോവാളയില്‍ വയോധിക ദുരൂഹ സാഹചര്യത്തില്‍ കൊല്ലപ്പെട്ടിട്ട് ദിവസങ്ങൾ പിന്നിടുമ്പോഴും പ്രതി കാണാമറയത്ത്. കഴിഞ്ഞ വ്യാഴാഴ്ച പുലര്‍ച്ചെയാണ് കൊച്ചുപുരയ്ക്കല്‍ ജോര്‍ജിന്റെ ഭാര്യ ചിന്നമ്മ (60)യെ മരിച്ച നിലയില്‍ കണ്ടെത്തിയത്. തുടര്‍ന്ന് വെള്ളിയാഴ്ച നടത്തിയ പോസ്റ്റ് മോര്‍ട്ടത്തിലാണ് ചിന്നമ്മയുടേത് കൊലപാതകമാണെന്ന് സ്ഥിരീകരിച്ചത്. ചിന്നമ്മയുടെ ശരീരത്തിലെ നാല് പവന്‍ ആഭരങ്ങള്‍ കാണാനില്ലെന്നും കണ്ടെത്തിയിട്ടുണ്ട്. എന്നാല്‍ സംഭവം നടന്ന് ദിവസങ്ങൾ പിന്നിട്ടിട്ടും കൊലയാളിയെ പിടികൂടാത്തത് പോലീസിന്റെ വീഴ്ചയാണെന്ന ആക്ഷേപവും ഉയരുന്നുണ്ട്. ഉറങ്ങാന്‍ കിടന്ന വീട്ടമ്മയെ പുലര്‍ച്ചെ കൊല്ലപ്പെട്ട നിലയില്‍ കണ്ടെത്തിയത് പ്രദേശവാസികളെയും ആശങ്കയിലാക്കിയിട്ടുണ്ട്.