സംസ്ഥാനത്ത് മുടങ്ങിക്കിടന്ന ജല വൈദ്യുത പദ്ധതികള്‍ക്കുള്ള തടസ്സങ്ങള്‍ നീങ്ങുന്നു
തിരുവനന്തപുരം: സംസ്ഥാനത്ത് മുടങ്ങിക്കിടന്ന ജല വൈദ്യുത പദ്ധതികള്‍ക്കുള്ള തടസ്സങ്ങള്‍ നീങ്ങുന്നു. പദ്ധതികള്‍ക്കാവശ്യമായ വനം വകുപ്പിന്റെ അനുമതി വേഗത്തിലാക്കാന്‍ ധാരണയായി.വനം-വൈദ്യുതി വകുപ്പ് മന്ത്രിമാര്‍ ഇത് സംബന്ധിച്ച്‌ ചര്‍ച്ച നടത്തി.
800 മെഗാ വാട്ട് ശേഷിയുള്ള ഇടുക്കി എക്‌സ്റ്റെന്‍ഷന്‍ പദ്ധതിക്ക് കേന്ദ്ര വനം പരിസ്ഥിതി മന്ത്രാലയത്തിന്റെ ഒന്നാംഘട്ട പാരിസ്ഥിതിക അനുമതി ലഭിച്ചിരുന്നു. അടുത്ത ഘട്ടം കേന്ദ്ര വൈദ്യുതി അതോറിറ്റിയുടെയും, ജല കമ്മീഷന്റെയും, പരിസ്ഥിതി മന്ത്രാലയത്തിന്റെയും നിബന്ധനകള്‍ നിറവേറ്റുന്നതാണ്. ഇതിന് വനം വകുപ്പിന്റെ അനുമതി വേണം. ഇതിനായി പരിവേഷ് പോര്‍ട്ടലില്‍ അപേക്ഷിക്കാന്‍ കെ.എസ്.ഇ.ബിക്ക് നിര്‍ദേശം ലഭിച്ചു.
ആനക്കയം, മാരിപ്പുഴ, മാങ്കുളം, കുറ്റ്യാടി ഒഗ്മെന്റേഷന്‍, തോട്ടിയാര്‍, അപ്പര്‍ ചെങ്കുളം തുടങ്ങിയ ജലവൈദ്യുത പദ്ധതികള്‍ക്കാവശ്യമായ വനം വകുപ്പിന്റെ അനുമതിയും സമയബന്ധിതമായി നല്‍കും. 110 കെ വി കളപ്പെട്ടി – നെന്മാറ, 110 കെ.വി ആറ്റിങ്ങല്‍ – പാലോട്, 220 കെ.വി പള്ളിവാസല്‍ – ആലുവ എന്നീ പ്രസരണ ലൈനുകളുടെ നിര്‍മാണത്തിനുള്ള അനുമതിയും കാലതാമസമില്ലാതെ നല്‍കാമെന്ന് വനം വകുപ്പ് യോഗത്തില്‍ അറിയിച്ചു. കക്കയം ഹൈഡല്‍ ടൂറിസം പദ്ധതി വനംവകുപ്പും ഹൈഡല്‍ ടൂറിസവും ചേര്‍ന്ന് വരുമാനം പങ്കിടല്‍ വ്യവസ്ഥയില്‍ നടത്തുന്ന കാര്യം തുടര്‍ ചര്‍ച്ചയിലൂടെ തീരുമാനിക്കും.
