സിനിമാ മോഹവുമായി എത്തുന്ന പെണ്‍കുട്ടികളെ ഉപയോഗിച്ച്‌ അശ്ലീല വീഡിയോ നിര്‍മിച്ച കേസില്‍ സംവിധായകനും സഹസംവിധായികയും അറസ്റ്റില്‍.
തമിഴ്‌നാട് സേലത്ത് ഗ്ലോബല്‍ ക്രിയേഷന്‍ എന്ന പേരില്‍ സിനിമാ കമ്ബനി നടത്തുന്ന വേല്‍സത്രിയന്‍ (38), സുഹൃത്ത് ജയജ്യോതി (23) എന്നിവരാണ് അറസ്റ്റിലായത്. സിനിമയില്‍ അവസരം നല്‍കാമെന്ന് പറഞ്ഞ് നാനൂറിലേറെ സ്ത്രീകളില്‍നിന്ന് ഇവര്‍ പണം തട്ടിയതായാണ് വിവരം.
കമ്ബനിയില്‍ എത്തുന്ന പെണ്‍കുട്ടികളെ ഉപയോഗിച്ചാണ് അശ്ലീല വിഡിയോ നിര്‍മിച്ചിരുന്നത്. മുപ്പതിലധികം ഹാര്‍ഡ് ഡിസ്‌കുകളില്‍ ഇത്തരത്തില്‍ മുന്നൂറിലധികം വീഡിയോകള്‍ പൊലീസ് കണ്ടെത്തി. സിനിമയിലെ റോളുകള്‍ക്കായി മുപ്പതിനായിരം രൂപ ഇയാള്‍ അഡ്വാന്‍സ് വാങ്ങിയിരുന്നതായും പൊലീസ് പറയുന്നു. ഇരുവരെയും സേലം ജില്ലാ കോടതിയില്‍ ഹാജരാക്കി. കോടതി ആറു ദിവസത്തെ പൊലീസ് കസ്റ്റഡിയില്‍ വിട്ടിട്ടുണ്ട്.
നമ്ബര്‍ എന്നു പേരിട്ട ചിത്രത്തില്‍ അഭിനേതാക്കളെ തേടിയാണ് സത്രിയന്‍ ഏറ്റവും ഒടുവില്‍ സമൂഹമാധ്യമത്തില്‍ പരസ്യം ചെയ്തത്. ചിത്രത്തിന്‍റെ ഓഡിഷന് വേണ്ടി എത്തുന്ന യുവതികളെ കൊണ്ട് ഇന്റിമേറ്റ് സീനുകളില്‍ അഭിനയിപ്പിച്ചു. ചിത്രങ്ങളുമെടുത്തു. ഇവ കാണിച്ച്‌ യുവതികളെ ഭീഷണിപ്പെടുത്തുകയും ചെയ്തു.
ചിത്രത്തില്‍ വേഷം തേടിയെത്തി വഞ്ചിക്കപ്പെട്ട യുവതിയാണ് പൊലീസിനെ സമീപിച്ചത്. സിനിമയില്‍ അവസരം തരാമെന്ന് പറഞ്ഞ് ഇവരില്‍ നിന്ന് വേല്‍ സത്രിയനും ജയജ്യോതിയും മുപ്പതിനായിരം രൂപ കൈപ്പറ്റിയിരുന്നു. പണം തിരിച്ചുചോദിച്ചതോടെ യുവതിക്ക് സിനിമാ കമ്ബനിയില്‍ ഓഫീസ് ഗേളിന്റെ ജോലി നല്‍കി. മൂന്നു മാസം ജോലി ചെയ്തിട്ടും ശമ്ബളമൊന്നും കിട്ടിയില്ല. വേല്‍ സത്രിയന്റെ കൂടെ ഇന്റിമേറ്റ് രംഗങ്ങളില്‍ അഭിനയിക്കാന്‍ നിര്‍ബന്ധിക്കുകയും ചെയ്തു.
ഇതോടെ യുവതി ജോലി ഉപേക്ഷിച്ചു. ശമ്ബളത്തിനായുള്ള ശ്രമങ്ങള്‍ക്കിടെയാണ് നിരവധി യുവതികളുടെ വീഡിയോകളും ചിത്രങ്ങളും ഇവരുടെ ശ്രദ്ധയില്‍പ്പെട്ടത്. ഇതോടെ ഇവര്‍ സൂരമംഗലം പൊലീസ് സ്റ്റേഷനില്‍ പരാതി നല്‍കുകയായിരുന്നു. സംവിധായകനെതിരെ ഇതുവരെ 12 പരാതികളാണ് ലഭിച്ചിട്ടുള്ളതെന്ന് പൊലീസ് അറിയിച്ചു. തട്ടിപ്പിനിരയായ എല്ലാവരും പരാതി നല്‍കണമെന്ന് സേലം സിറ്റി പൊലീസ് കമ്മിഷണര്‍ നജ്മുല്‍ ഹുദ അഭ്യര്‍ത്ഥിച്ചു. പരാതികള്‍ക്കായി സൂരമംഗലം വനിതാ പൊലീസ് സ്റ്റേഷനില്‍ പ്രത്യേക സംവിധാനം രൂപീകരിച്ചു. പരാതി നല്‍കുന്നവരുടെ വിവരങ്ങള്‍ രഹസ്യമായി സൂക്ഷിക്കുമെന്ന് പൊലീസ് അറിയിച്ചിട്ടുണ്ട്.
