വണ്ടിപ്പെരിയാര്‍ കമ്മ്യൂണിറ്റി ഹെല്‍ത്ത് സെന്ററില്‍ വെള്ളം കയറുന്നതിന് പരിഹാരമായി.
വണ്ടിപ്പെരിയാര്‍ : കമ്മ്യൂണിറ്റി ഹെല്‍ത്ത് സെന്ററില്‍ വെള്ളം കയറുന്നതിന് പരിഹാരമായി. സെന്ററിനു മുമ്ബിലുള്ള ഇടുങ്ങിയതും ചെറുതുമായ പാലം പൊളിച്ചു പുതിയ പാലം പണിയാന്‍ ബ്ലോക്ക് പഞ്ചായത്ത് നടപടി ആരംഭിച്ചു .
ചുരക്കുളം തോട് നിറഞ്ഞ് കവിഞാല്‍ ഈ വെള്ളം താഴ്ന്ന പ്രദേശമായ ആശുപത്രിയിലും സമീപത്തും കയറാനിടയാകും. അറുപത്തിആറാം മൈല്‍, തൊണ്ടിയാര്‍ ഭാഗത്തുള്ള കര്‍ഷകരുടെ ചെക്ക്ഡാം തുറന്നാലും നിറഞ് കവിഞ്ഞാലും ആശുപത്രിയും പരിസരവും വെള്ളം കൊണ്ട് നിറയും. ഇവിടെ എത്തുന്ന രോഗികള്‍ക്കും,65 ല്‍ അധികം ജീവനക്കാര്‍ക്കും ഇത് ബുദ്ധിമുട്ടുണ്ടാക്കുന്നു. ആശുപത്രിയിലെ മരുന്നുകള്‍ കേട്പാട് സംഭവിച്ച്‌ നഷ്ടപ്പെടുന്നതിനുംഇത് ഇടയാകുന്നു.
ഈ പ്രശ്‌നങ്ങള്‍ക്കും ഇതോടെ പരിഹാരമാകുകയാണ്. എല്ലാ ദിവസവും മുന്നൂറില്‍ അധികം രോഗികള്‍ ഇവിടെ എത്തുന്നുണ്ട്. പതിനായിരത്തില്‍ അധികം തോട്ടം തൊഴിലാളികള്‍ താമസിക്കുന്ന പ്രദേശമാണ് വണ്ടിപ്പെരിയാര്‍ . ഇവിടത്തെ ഏക സര്‍ക്കാര്‍ ആതുരാലയമാണ് ഈ കമ്മ്യൂണിറ്റി ഹെല്‍ത്ത് സെന്റര്‍.
ശക്തമായ മഴ പെയ്താല്‍ ഹെല്‍ത്ത് സെന്ററില്‍ വെള്ളം കയറുന്ന അവസ്ഥ ഒഴിവാക്കാനാണ് ബ്ലോക്ക് പഞ്ചായത്ത് 50 ലക്ഷം രൂപ ചെലവഴിച്ചാണ് പാലങ്ങളുടെ പുനര്‍ നിര്‍മ്മാണം തീരുമാനിച്ചത്. ചെറിയ പാലം പൊളിച്ച്‌ നീക്കി സംരക്ഷണ ഭിത്തി നിര്‍മ്മിച്ച്‌ നടപ്പാലം പണിയുന്നതിനും,നിലവിലുള്ള വലിയ പാലം വെള്ളം കയറാത്ത രീതിയില്‍ ഉയര്‍ത്തുകയും ,തോടിന്റെ വീതി കൂട്ടി സംരക്ഷണഭിത്തി പണിത് പാലംഉയര്‍ത്താനുമാണ് തീരുമാനം. ചെറിയ പാലത്തിനടിയില്‍ രണ്ടടി മാത്രം വീതിയില്‍ ബീം നിര്‍മ്മിച്ചരിക്കുന്നതിനാല്‍ തോട്ടിലൂടെ ഒഴുകി വരുന്ന തടികളും പാഴ് വസ് ത്തുക്കളും ബീമില്‍തട്ടി തടസ്സം ഉണ്ടാകുകയും വെള്ളം ആശുപത്രി പരിസരത്തേക്ക് കയറാനും ഇടയാകുന്നു .ചെറിയ പാലത്തിന്റെ വിസ്തൃതി കൂട്ടി സംരക്ഷണഭിത്തി നിര്‍മ്മിച്ച്‌ നടപ്പാലമായി പണിയാനാണ് ബ്ലോക്ക് പഞ്ചായത്ത് തീരുമാനം എന്ന് പ്രസിഡന്റ് പി.എം.നൗഷാദ് പറഞ്ഞു. ബ്ലോക്ക് പഞ്ചായത്ത് എക്‌സിക്യൂട്ടീവ് എന്‍ജിനീയര്‍ ഉഷാനന്ദന്‍,അസിസ്റ്റന്റ് എഞ്ചിനീയര്‍ അജി എന്നിവര്‍ സ്ഥലം സന്ദര്‍ശിച്ചു.
