ഇടുക്കി രൂപതാ സമർപ്പിത സംഗമം ഞായറാഴ്ച വാഴത്തോപ്പിൽ
ആഗോള സമർപ്പിത ദിനാഘോഷത്തിന്റെ ഭാഗമായി ഇടുക്കി രൂപതയുടെ നേതൃത്വത്തിൽ നാളെ വാഴത്തോപ്പിൽ സമർപ്പിത സംഗമം നടക്കും. ഇടുക്കി രൂപതയിൽ ശുശ്രൂഷ ചെയ്യുന്ന മുഴുവൻ സമർപ്പിതരും പങ്കെടുക്കുന്ന മഹാസംഗമം ഇടുക്കി രൂപതാ മെത്രാൻ മാർ ജോൺ നെല്ലിക്കുന്നേൽ ഉദ്ഘാടനം ചെയ്യും. സഭയിൽ ശുശ്രൂഷ ചെയ്യുന്ന സന്യസ്തർക്കുവേണ്ടി പ്രത്യേകമായി പ്രാർത്ഥിക്കാനും സമർപ്പിത ദൈവവിളികളെ പ്രോത്സാഹിപ്പിക്കാനുമായി വിശുദ്ധ ജോൺപോൾ രണ്ടാമൻ മാർപാപ്പ 1997 ലാണ് ആഗോള സമർപ്പിത ദിനം പ്രഖ്യാപിച്ചത്. ഇതിന്റെ 28 മത് വാർഷികമാണ് ഈ വർഷം നടക്കുന്നത്. എല്ലാവർഷവും ഫെബ്രുവരി രണ്ടിന് നടത്തിവരുന്ന ഈ ദിനാചരണം ക്രിസ്തുജയന്തിയുടെ ജൂബിലി വർഷമായ ഈ വർഷം സവിശേഷമായ പ്രാധാന്യത്തോടെയാണ് സഭ കൊണ്ടാടുന്നത്.
ഇടുക്കി രൂപതയിൽ ശുശ്രൂഷ ചെയ്യുന്ന 32 വ്യത്യസ്ത സന്യാസിനീ സമൂഹങ്ങളിൽ അംഗങ്ങളായ സമർപ്പിതർ രണ്ടാം തീയതി ഞായറാഴ്ച വാഴത്തോപ്പ് സെന്റ് ജോർജ് കത്തീഡ്രൽ പള്ളിയിൽ സംഗമിക്കും. രാവിലെ 9.15ന് പാരീഷ് ഹാളിൽ നിന്നും ആരംഭിക്കുന്ന പ്രദക്ഷിണത്തോടെയാണ് സമർപ്പിത സംഗമം ആരംഭിക്കുന്നത്. പ്രദക്ഷിണത്തിൽ അൾത്താര ബാലസംഘവും മാലാഖ വേഷധാരികളായ കുട്ടികളും സമർപ്പിതർക്ക് ആശംസകൾ അർപ്പിച്ചുകൊണ്ട് വിവിധ ഭക്തസംഘടനകളുടെ പ്രതിനിധികളും അണിനിരക്കും. തുടർന്ന് 32 സന്യാസിനി സമൂഹങ്ങളുടെയും പ്രതിനിധികൾ കാഴ്ച സമർപ്പണം നടത്തും. തുടർന്ന് നടക്കുന്ന ആഘോഷമായ വിശുദ്ധ കുർബാനയ്ക്ക് രൂപതാ മെത്രാൻ മാർ ജോൺ നെല്ലിക്കുന്നേൽ മുഖ്യ കാർമികത്വം വഹിക്കും. രൂപതാ വികാരി ജനറാൾമാരായ മോൺ. ജോസ് കരിവേലിക്കൽ, മോൺ. ജോസ് പ്ലാച്ചിക്കൽ, മോൺ. അബ്രഹാം പുറയാറ്റ് എന്നിവർ സഹകാർമികരാകും. വിശുദ്ധ കുർബാനയ്ക്ക് ശേഷം സമർപ്പിതരുടെ വൃതവാഗ്ദാന നവീകരണം നടത്തും.
11.30ന് പാരീഷ് ഹാളിൽ നടക്കുന്ന പൊതുസമ്മേളനം അഭി. പിതാവ് ഉദ്ഘാടനം ചെയ്യും. അഡ്വ.സി. ജോസിയ എസ്.ഡി മുഖ്യപ്രഭാഷണം നടത്തും. ഉച്ചഭക്ഷണത്തിനുശേഷം നടക്കുന്ന സമ്മേളനത്തിൽ ക്രിസ്തുജയന്തിയുടെ ജൂബിലി ആന്തം റിലീസ് ചെയ്യുകയും സമർപ്പിതർ അത് ആലപിക്കുകയും ചെയ്യും. വിവിധ മേഖലകളിൽ ശ്രദ്ധേയമായ സംഭാവനകൾ നൽകിയ സമർപ്പിതരെ രൂപതയുടെ സമർപ്പിത അവാർഡുകൾ നൽകി ആദരിക്കും. വിവിധ മത്സരങ്ങളിൽ വിജയികളായവർക്കുള്ള സമ്മാനങ്ങളും വിതരണം ചെയ്യും. രൂപത പാസ്റ്റർ കൗൺസിൽ സെക്രട്ടറി ശ്രീ. ജോർജ് കോയിക്കൽ ആശംസകൾ അർപ്പിച്ച് സംസാരിക്കും. നാലുമണിക്ക് നടക്കുന്ന സമാപന പ്രാർത്ഥനയോടെ പരിപാടികൾ അവസാനിക്കും. ഫാ. ഫ്രാൻസിസ് ഇടവക്കണ്ടം, ഫാ. മാത്യു അഴകനാക്കുന്നേൽ, ഫാ. ഫിലിപ്പ് ഐക്കര, ഫാ. ജിൻസ് കാരയ്ക്കാട്ട്, സി. പ്രദീപാ സി.എം.സി, സി. ലിറ്റി ഉപ്പുമാക്കൽ എസ്.എ.ബി.എസ്, സി.റോസ്ലിൻ എഫ്.സി.സി, സി. ടെസ്ലിൻ എസ് എച്ച്, എന്നിവർ പരിപാടികൾക്ക് നേതൃത്വം നൽകും.
ഇടുക്കി രൂപതാ സമർപ്പിത അവാർഡുകൾ പ്രഖ്യാപിച്ചു
ആഗോള സമർപ്പിത ദിനാചരണത്തോടനുബന്ധിച്ച് വിവിധ മേഖലകളിൽ ശ്രദ്ധേയമായ സംഭാവനകൾ നൽകിയ സമർപ്പിതർക്കായുള്ള അവാർഡുകൾ പ്രഖ്യാപിച്ചു. ആതുര ശുശ്രൂഷ മേഖലയിൽ ഹൈറേഞ്ചിൽ സ്തുതിർഹമായ സേവനം കാഴ്ചവച്ച സി. ജ്യോതിസ് സി.എസ്.എൻ, അജപാലന ശുശ്രൂഷയിൽ തനതായ സംഭാവനകൾ നൽകിയ സി. മേബിൾ സി.എം.സി, മിഷൻ പ്രവർത്തനങ്ങളിൽ തീക്ഷ്ണമായ ശുശ്രൂഷ നിർവഹിക്കുന്ന സി. റെജി പന്തലാനി എസ്.എ.ബി.എസ്, ഹോമിയോ ചികിത്സ വഴി ആയിരങ്ങൾക്ക് ആശ്വാസം പകരുന്ന ഡോ.സി. ഡെനി മരിയ എസ്.എച്ച്, സാമൂഹിക പ്രവർത്തനങ്ങളിൽ വലിയ സംഭാവനകൾ നൽകിയ സി. ലീജ എസ്.ഡി, എന്നിവർക്കും പാലിയേറ്റീവ് കെയർ ഉൾപ്പെടെയുള്ള സ്നേഹ സാന്ത്വന ശുശ്രൂഷൾകൊണ്ട് ശ്രദ്ധേയമായ എഫ്.സി.സി അനാവിം സെന്റർ മുരിക്കാശ്ശേരി, അനാഥരാക്കപ്പെട്ട അമ്മമാരെ ശുശ്രൂഷിക്കുന്ന ദൈവദാൻ സെന്റർ തങ്കമണി എന്നീ സ്ഥാപനങ്ങൾക്കുമാണ് അവാർഡുകൾ നൽകുന്നത്. ഫെബ്രുവരി രണ്ടിന് വാഴത്തോപ്പ് സെന്റ് ജോർജ് കത്തീഡ്രൽ പാരിഷ് ഹാളിൽ നടക്കുന്ന ഇടുക്കി രൂപതാ സമർപ്പിത സംഗമത്തിൽ രൂപതാ മെത്രാൻ മാർ ജോൺ നെല്ലിക്കുന്നേൽ അവാർഡുകൾ വിതരണം ചെയ്യും.
