വാരണാസി മുതൽ കന്യാകുമാരി വരെ ഹോട്ടൽ ബുക്കിങ്ങിന് ശ്രമിക്കുന്നവരെ ലക്ഷ്യമിട്ട് വൻ തട്ടിപ്പ് സംഘം
ദില്ലി: അവധി ആഘോഷങ്ങള്‍ക്ക് ഓണ്‍ലൈനിലൂടെ ഹോട്ടല്‍ ബുക്ക് ചെയ്യുന്നവരെ ലക്ഷ്യമിട്ട് വന്‍ തട്ടിപ്പ് സംഘം.ഗൂഗിളില്‍ വ്യാജ കസ്റ്റമര്‍ കെയര്‍ നമ്പറുകള്‍ പങ്കുവച്ചാണ് തട്ടിപ്പ്. ഇത്തരത്തില്‍ ഇന്ത്യയില്‍ ഉടനീളമുള്ള ഹോട്ടലുകളെ ലക്ഷ്യമിട്ടാണ് തട്ടിപ്പ് സംഘം നമ്പറുകള്‍ പോസ്റ്റ് ചെയ്യുന്നത് പതിവായിരിക്കുകയാണെന്നാണ് സൈബര്‍ സുരക്ഷാ സ്ഥാപനമായ CloudSEK വിശദമാക്കുന്നത്.
ഗൂഗിളിലെ ഹോട്ടല്‍ ലിസ്റ്റിംഗുകളില്‍ വ്യാജ കസ്റ്റമര്‍ കെയര്‍ നമ്പറുകള്‍ പോസ്റ്റ് ചെയ്യുന്നത് ഇതിന്റെ ഭാഗമായാണ്. ഒപ്റ്റിക്കല്‍ ക്യാരക്ടര്‍ റെക്കഗ്നിഷന്‍ (OCR) സാങ്കേതികവിദ്യയ്ക്ക് റീഡ് ചെയ്യാന്‍ കഴിയാത്ത വിധത്തിലാണ് ഇവ രേഖപ്പെടുത്തുന്നത്. എന്നാല്‍ മനുഷ്യര്‍ക്ക് വായിക്കാന്‍ കഴിയും. CloudSEK-ന്റെ കണ്ടെത്തലുകള്‍ അനുസരിച്ച്‌, തട്ടിപ്പുകാര്‍ ഒരേ ഡിസൈനിലുള്ള ചിത്രങ്ങളാണ് മിക്ക സൈറ്റിലും ഉപയോഗിക്കുന്നത്. അവയില്‍ വ്യത്യസ്ത ഫോണ്‍ നമ്പറുകള്‍ ചേര്‍ത്തിട്ടുണ്ടാകും. ഉപഭോക്താക്കളെ കബളിപ്പിക്കാനായി ഈ ചിത്രങ്ങളാണ് തട്ടിപ്പുകാര്‍ ഹോട്ടല്‍ ലിസ്റ്റിംഗുകളുടെ അവലോകന വിഭാഗത്തില്‍ അപ്‌ലോഡ് ചെയ്തിരിക്കുന്നത്.
ജഗന്നാഥ പുരി, ഉജ്ജയിന്‍, വാരണാസി തുടങ്ങിയ മതപരമായ നഗരങ്ങള്‍ ഉള്‍പ്പെടെയുള്ള വിവിധ സംസ്ഥാനങ്ങളിലെ ഹോട്ടലുകളെയും സൈബര്‍ കുറ്റവാളികള്‍ ലക്ഷ്യമിടുന്നതായി സൂചനയുണ്ട്. എല്ലാ വിഭാഗങ്ങളിലുമുള്ള ഹോട്ടലുകളും ഹോംസ്റ്റേകളും ഇക്കൂട്ടര്‍ ലക്ഷ്യമിടുന്നുണ്ട്. പുതിയ ഗൂഗിള്‍ അക്കൗണ്ടുകള്‍ ഉപയോഗിച്ചാണ് ഇക്കൂട്ടര്‍ തട്ടിപ്പ് നടത്തുന്നത്. തട്ടിപ്പിന് പിന്നില്‍ എത്ര പേരുണ്ടെന്ന കാര്യത്തില്‍ വ്യക്തത വന്നിട്ടില്ല. പരിശോധനയ്ക്കിടെ കണ്ടെത്തിയ 19 വ്യാജ നമ്ബരുകളില്‍ 71 ശതമാനവും തട്ടിപ്പിന് ഉപയോഗിക്കാനായിരുന്നു.
ഓരോ നമ്പറില്‍ നിന്നും ശരാശരി 126 കോളുകള്‍ വരെ ചെയ്തിട്ടുണ്ട്. ഒരു ഹോട്ടല്‍ ബുക്ക് ചെയ്യുന്നതിന് മുമ്ബ് ഗൂഗിളില്‍ നല്‍കിയിരിക്കുന്ന നമ്ബറും ഔദ്യോഗിക വെബ്‌സൈറ്റില്‍ ലിസ്‌റ്റ് ചെയ്‌തിരിക്കുന്ന നമ്ബറും ക്രോസ് ചെക്ക് ചെയ്യേണ്ടതിന്‍റെ ആവശ്യകതയെക്കുറിച്ചാണ് സൈബര്‍ സുരക്ഷാ സ്ഥാപനം വിശദമാക്കുന്നത്. ട്രൂകോളര്‍ പ്രൊഫൈലുകളിലെ സ്കാന്‍ ചെയ്ത നമ്ബറുകളിലെ പേരുകളും ഗൂഗിള്‍ അക്കൗണ്ടുകളിലെ പേരുകളും വ്യത്യസ്തമാണ്. തട്ടിപ്പിനെ കുറിച്ച്‌ ബന്ധപ്പെട്ട വിഭാഗങ്ങള്‍ക്ക് നിര്‍ദേശങ്ങള്‍ നല്‍കി കഴിഞ്ഞു
