സോഷ്യല് മീഡിയ താരം അമ്മുക്കുട്ടി അമ്മൂമ്മ (106) വിടവാങ്ങി
ഇന്സ്റ്റഗ്രാമിലെ വൈറല് താരമായ അമ്മുക്കുട്ടി അമ്മൂമ്മ അന്തരിച്ചു. 106 വയസായിരുന്നു. വാര്ധക്യ സഹജമായ ബുദ്ധിമുട്ടുകളെ തുടര്ന്നാണ് അന്ത്യം.
106 വയസിലും കൊച്ചുമക്കളുടെ ഇന്സ്റ്റഗ്രാം അക്കൗണ്ടിലൂടെ വിശേഷങ്ങള് പറഞ്ഞ് വളരെ ആക്ടീവായിരുന്നു അമ്മുക്കുട്ടി അമ്മൂമ്മ. കടുത്ത മോഹന്ലാല് ആരാധികയായ ഈ മുത്തശ്ശി താരത്തെ നേരില് കാണണമെന്ന വലിയ ആഗ്രഹം ബാക്കിയാക്കിയാണ് വിടവാങ്ങുന്നത്. മോഹന്ലാല് അമ്മൂമ്മയുമായി വിഡിയോ കോളിലൂടെ സംസാരിച്ചത് ഏറെ വൈറലായിരുന്നു.
ഒരു നൂറ്റാണ്ടിലേറെ നീണ്ട ജീവിത യാത്രയില് കണ്ടതും അറിഞ്ഞതുമായ കഥകളും പഴഞ്ചൊല്ലുകളും അനുഭവകഥകളും ഗുണപാഠങ്ങളും അമ്മുക്കുട്ടി അമ്മൂമ്മ കട്ടിലില് കിടന്ന് പറയുമ്പോള് മലയാളി സോഷ്യല് മീഡിയ ഇടമാകെ കൗതുകത്തോടെ അത് കേട്ടുനില്ക്കുന്ന കുഞ്ഞുങ്ങളായി. തന്റെ സ്കൂളില്പ്പോക്ക് വിശേഷങ്ങളും പ്രണയവും കോട്ടയം അയ്മനത്തെ വിശേഷങ്ങളും ഇമ്പത്തോടെ പറഞ്ഞുതരുന്ന മുത്തശ്ശിക്ക് ഇന്സ്റ്റഗ്രാമില് നിരവധി ആരാധകരാണുള്ളത്. ചെറുമകള് ഗോപികയുടെ ഇന്സ്റ്റഗ്രാം പേജിലൂടെയാണ് മലയാളികള് അമ്മുക്കുട്ടി അമ്മൂമ്മയെ കേട്ടത്. ഗോപിക തന്നെയാണ് ഇന്സ്റ്റഗ്രാമിലൂടെ മരണവിവരം പുറത്തുവിട്ടത്.
