മുണ്ടക്കൈ–ചൂരൽമല ദുരന്തത്തിന് ഒരു വയസ്

കേരളത്തിന്റെ തീരാനോവായി മാറിയ മുണ്ടക്കൈ–ചൂരൽമല ദുരന്തത്തിന് ഇന്ന് ഒരു വയസ് പൂർത്തിയായി. 2024 ജൂലൈ 29-ന് രാത്രി 11.45ഓടെയാണ് പുഞ്ചിരിമട്ടം മേഖലയിൽ ആദ്യ മണ്ണിടിച്ചിൽ ഉണ്ടായത്. തുടർന്നും പുലർച്ചെ 1 മണിയോടെ അത് വൻ ഉരുള്‍പൊട്ടലായി മാറി.

ഔദ്യോഗിക കണക്കുകൾ പ്രകാരം 298 പേർ ജീവൻ നഷ്ടപ്പെട്ടു. ഇനിയും 32 പേരെ കണ്ടെത്താനായിട്ടില്ല. ചാലിയാർ, നിലമ്പൂർ എന്നിവിടങ്ങളിൽ നിന്ന് 223 ശരീരഭാഗങ്ങൾ ശേഖരിക്കപ്പെട്ടു. മരിച്ചവരിൽ 99 പേരെ ഡിഎൻഎ പരിശോധനയിലൂടെ തിരിച്ചറിഞ്ഞു.

ഒരു വർഷം പിന്നിടുമ്പോൾ ദുരന്തബാധിതർ ഇപ്പോഴും അതിജീവനത്തിന്റെ പാതയിലാണ്. സർക്കാരിന്റെ പല വാഗ്ദാനങ്ങളും നടപ്പിലാക്കിയിട്ടില്ലെന്ന് നാട്ടുകാർ ആരോപിക്കുന്നു. സ്വന്തമായി ഭൂമിയും വീടുമെന്ന ആവശ്യങ്ങൾ ഇന്നും പൂർത്തിയായിട്ടില്ല.

പുഞ്ചിരിമട്ടം, മുണ്ടക്കൈ ഗ്രാമങ്ങൾ മലവെള്ളപ്പാച്ചിലിൽ മുഴുവൻ ഒലിച്ചുപോയി. 400-ഓളം കുടുംബങ്ങളാണ് ദുരന്തത്തിൽ ഒറ്റപ്പെട്ടത്. പുലർച്ചെ 4.10ന് ചൂരൽമലയിൽ രണ്ടാമത്തെ ഉരുള്‍പൊട്ടലും ഉണ്ടായി. മുണ്ടക്കൈപ്പുഴ വഴിമാറി ഒഴുകിയപ്പോൾ പാലം തകർന്നു, വെള്ളാർമല ജിവിഎച്ച്എസ്എസ് സ്കൂളിന്റെ ഭൂരിഭാഗവും മണ്ണിനടിയിലായി. ഗതാഗത സൗകര്യം തകർന്നതോടെ രക്ഷാപ്രവർത്തനം അതീവ ബുദ്ധിമുട്ടോടെ നടന്നു.

ഉച്ചയ്ക്ക് 12 മണിയോടെ ഇന്ത്യൻ സൈന്യം എത്തി. 24 മണിക്കൂറിനുള്ളിൽ ചൂരൽമലയെയും മുണ്ടക്കൈയെയും ബന്ധിപ്പിച്ചുകൊണ്ട് സൈന്യം ബെയ്ലി പാലം നിർമ്മിച്ചു. സൈന്യം, ദുരന്തനിവാരണ അതോറിറ്റി, പൊലീസ്, അഗ്നിരക്ഷാസേന, യുവജന, സന്നദ്ധസംഘടനകൾ തുടങ്ങിയവ ചേർന്നപ്പോൾ രക്ഷാപ്രവർത്തനം ഊർജിതമായി.

വാർഡ് 10 ആയ മുണ്ടക്കൈയിൽ മാത്രമാണ് ഏറ്റവും കൂടുതൽ ജീവൻ നഷ്ടമായത് – 145 പേർ. ചൂരൽമലയിൽ 137 പേരും അട്ടമലയിൽ 16 പേരും മരിച്ചു. ആകെ 1,424 പേർ ദുരന്തത്തിൽ നിന്ന് രക്ഷപ്പെട്ടു.

കണക്കുകൾ പ്രകാരം 1,555-ലധികം വീടുകൾ, സ്കൂളുകൾ, ഒരു ഡിസ്പെൻസറി, പഞ്ചായത്ത് ഭവൻ, വൈദ്യുതി ബോർഡ് ഓഫീസ്, 136 കമ്മ്യൂണിറ്റി കെട്ടിടങ്ങൾ എന്നിവ തകർന്നു. 290 കടകളും, 124 കിലോമീറ്റർ വൈദ്യുതി സൗകര്യങ്ങളും, രണ്ട് ട്രാൻസ്ഫോർമറുകളും, 1.5 കിലോമീറ്റർ ഗ്രാമീണ റോഡുകളും, മൂന്ന് പാലങ്ങളും ഇല്ലാതായി. ഏകദേശം 600 ഹെക്‌ടർ (1,500 ഏക്കർ) ഭൂമി, അതിൽ 310 ഹെക്‌ടർ കൃഷിയിടങ്ങൾ ഉൾപ്പെടെ, മണ്ണിടിച്ചിലിൽ ഒലിച്ചുപോയി.

25 കോടിയിലധികം രൂപയുടെ നഷ്ടമാണുണ്ടായതെന്ന് വ്യാപാരി വ്യവസായി ഏകോപന സമിതി കണക്കുകൾ പറയുന്നു. കൂടുതൽ മണ്ണിടിച്ചിൽ സാധ്യത ചൂണ്ടിക്കാട്ടി ചൂരൽമലയിലെയും മുണ്ടക്കൈയിലെയും നൂറുകണക്കിന് കടകൾ അടച്ചുപൂട്ടിയിരുന്നു.

ദുരന്തബാധിതർക്കായി സർക്കാർ കൽപ്പറ്റ എൽസ്റ്റൺ എസ്റ്റേറ്റിൽ 410 വീടുകൾ ഉൾക്കൊള്ളുന്ന ടൗൺഷിപ്പ് നിർമ്മിക്കുന്നു. ഊരാളുങ്കൽ ലേബർ കോൺട്രാക്ട് സൊസൈറ്റിയാണ് നിർമാണം ഏറ്റെടുത്തിരിക്കുന്നത്. ഡിസംബറോടെ പൂർത്തിയാകുമെന്നാണ് പ്രതീക്ഷ. എന്നാൽ അർഹരായ പലരും സർക്കാർ പട്ടികയിൽ ഉൾപ്പെട്ടിട്ടില്ലെന്നതാണ് നാട്ടുകാരുടെ പരാതി. ഭൂമി ഏറ്റെടുക്കൽ വൈകിയതിനാലാണ് നിർമ്മാണവും നീണ്ടുപോയതെന്ന് അധികൃതർ വ്യക്തമാക്കുന്നു