മൂന്നാറിൽ ടൂറിസം പോലീസ് സ്റ്റേഷൻ പരിഗണനയിൽ: മന്ത്രി പി.സി വിഷ്ണുനാഥ്
മൂന്നാറിൽ ടൂറിസം പോലീസ് സ്റ്റേഷൻ സ്ഥാപിക്കുന്ന കാര്യം മുഖ്യമന്ത്രിയോടും ആഭ്യന്തരമന്ത്രിയോടും ആലോചിച്ച് തീരുമാനിക്കുമെന്ന് ടൂറിസം സാംസ്കാരിക വകുപ്പ് മന്ത്രി പി. സി വിഷ്ണുനാഥ്. മൂന്നാറിൽ ടൂറിസവുമായി ബന്ധപ്പെട്ട് പ്രവർത്തിക്കുന്നവരുടെ യോഗത്തിന് ശേഷം മാധ്യമപ്രവർത്തകരോട് സംസാരിക്കുകയായിരുന്നു മന്ത്രി.
ടൂറിസ്റ്റുകൾക്ക് നേരെയുള്ള ആക്രമണങ്ങളെ ഗൗരവത്തോടെയാണ് കാണുന്നത്. അനിഷ്ടസംഭവങ്ങൾ ഒഴിവാക്കാൻ ഇടുക്കി ജില്ലാ കളക്ടർ, ജില്ല പോലീസ് മേധാവി എന്നിവർ അതിർത്തി ജില്ലയിലെ കളക്ടർ,പോലീസ് മേധാവി എന്നിവരുമായി ചേർന്ന് ഏകോപനത്തോടെ പ്രവർത്തിക്കും. മൂന്നാറിനെ കൂടുതൽ മനോഹരിയാക്കി ലോകത്തിൻ്റെ മുന്നിൽ അവതരിപ്പിക്കുന്നതിനുള്ള ശക്തമായ നടപടികൾ സർക്കാർ തുടരും. മൂന്നാറിലെ ടൂറിസ്റ്റ് ഗൈഡുകൾക്ക് കിറ്റ്സിൻ്റെ (കേരള ഇൻസ്റ്റിറ്റ്യൂട്ട് ഓഫ് ടൂറിസം ആൻ്റ് ട്രാവൽ സ്റ്റഡീസ്) കീഴിൽ പരിശീലനം നൽകും. പാർക്കിംഗ് പ്രശ്നത്തിന് പരിഹാരം കാണും. വിവിധ വകുപ്പുകളുടെ കൈവശമുള്ള ഭൂമി പാർക്കിംഗിനായി വിട്ടുകിട്ടുന്നതിന് വേണ്ട നടപടികൾ സ്വീകരിക്കും. ഗതാഗതകുരുക്ക് ഒഴിവാക്കുന്നതിന് എലിവേറ്റഡ് പാത എന്ന ഒരു ആശയം യോഗത്തിൽ ഉയർന്നിരുന്നു. ഇക്കാര്യം ദേശീയ പാത അതോരിറ്റിയുമായി ചർച്ച ചെയ്യും.
2025 ൽ മൂന്ന് കോടി സഞ്ചാരികളാണ് മൂന്നാറിലെത്തിയത്. കോവിഡിന് ശേഷം ഇത്രയും ടൂറിസ്റ്റുകൾ എത്തിയ മറ്റൊരു വിനോദസഞ്ചാര കേന്ദ്രമില്ല. ഇത്രയും സഞ്ചാരികൾ എത്തുന്ന മൂന്നാറിൽ അന്താരാഷ്ട്ര ടൂറിസം കേന്ദ്രങ്ങളിലുള്ളത് പോലുള്ള ടോയ്ലറ്റ് സംവിധാനം ടൂറിസം വകുപ്പ് തദ്ദേശ സ്ഥാപനങ്ങളുടെ സഹകരണത്തോടെ നടപ്പാക്കും. മാലിന്യ സംസ്കരണത്തിലെ പ്രശ്നങ്ങളും പരിഹരിക്കും.റോഡുകൾ വീതി കൂട്ടുന്നതിന് ഭൂമി വിട്ടു കിട്ടുന്നതിന് ഉൾപ്പടെയുള്ള കാര്യങ്ങളിൽ സർക്കാരിൻ്റെ ഇടപെടലുണ്ടാകും. അഡ്വഞ്ചർ ടൂറിസം ഓരോ പ്രദേശത്തിൻ്റെയും സവിശേഷ സാഹചര്യമനുസരിച്ചാണ് നടപ്പിലാക്കേണ്ടത്. മൂന്നാർ പോലെ അതീവ പരിസ്ഥിതി ദുർബല പ്രദേശത്ത് ചില നിയന്ത്രണങ്ങൾ ഏർപ്പെടുത്തേണ്ടി വരുമെന്നും മന്ത്രി പറഞ്ഞു.
ഡീൻ കുര്യാക്കോസ് എം. പി, എഫ്. രാജ എം.എൽ.എ, ടൂറിസം സെക്രട്ടറി കെ ബിജു, ഡയറക്ടർ എം. അജ്ഞന, ജില്ലാ കളക്ടർ ഡോ. ദിനേശൻ ചെറുവാട്ട്, ജില്ലാ പോലീസ് മേധാവി സാബു മാത്യു കെ. എം, ദേവികുളം സബ്കളക്ടർ വി.എം ആര്യ, വിവിധ വകുപ്പ് ഉദ്യോഗസ്ഥർ, ടൂറിസം മേഖലയിൽ പ്രവർത്തിക്കുന്നവർ തുടങ്ങിയവർ പങ്കെടുത്തു.
