മണ്ഡല മകരവിളക്ക് തീർത്ഥാടനത്തിനായി ശബരിമല ക്ഷേത്രനട ഇന്ന് തുറക്കും
പത്തനംതിട്ട: മണ്ഡല മകരവിളക്ക് തീർത്ഥാടനത്തിനായി ശബരിമല ക്ഷേത്രനട ഇന്ന് വൈകിട്ട് അഞ്ചിന് തുറക്കും. പുതിയ ശബരിമല, മാളികപ്പുറം മേൽശാന്തിമാരുടെ അവരോധന ചടങ്ങും ഇന്ന് നടക്കും. ശബരിമലയിൽ കയറാൻ പാടില്ലാത്ത ആരെയും കയറ്റില്ലെന്ന് ശബരിമല പൊലീസ് കോ ഓർഡിനേറ്റർ എഡിജിപി എം ആർ അജിത് കുമാർ പറഞ്ഞു. സംശയാസ്പദമായ വ്യക്തികളെ കണ്ടാലും സംശയാസ്പദമായ വസ്തുക്കൾ കണ്ടാലും വിവരം അറിയിക്കണമെന്ന് ഡ്യൂട്ടിയിലുളള പൊലീസുകാർക്ക് എഡിജിപി നിർദേശം നൽകി.
സന്നിധാനം ഉൾപ്പെടെ പ്രധാന പോയിന്റുകളിൽ പൊലീസ് ഉദ്യോഗസ്ഥർ ഡ്യൂട്ടിയിൽ പ്രവേശിച്ചു. ശബരിമലയിൽ പൊലീസ്കാരുടെ ഡ്യൂട്ടി ഒരു പ്രാർത്ഥനയാണെന്നും സംതൃപ്തമായ ദർശനം ഒരുക്കുക എന്നതാണ് പൊലീസിന്റെ ഉത്തരവാദിത്വമെന്നും എഡിജിപി വ്യക്തമാക്കി.
വൃശ്ചികം ഒന്നിന് പുതിയ മേൽശാന്തിമാർ ഇരു നടകളും തുറക്കും. ഡിസംബർ 26ന് തങ്കയങ്കി ചാർത്തിയുള്ള ദീപാരാധന നടക്കും. 27 ന് മണ്ഡല പൂജ നടക്കും. അന്ന് രാത്രി ഹരിവരാസനം പാടി അടയ്ക്കുന്ന നട ഉത്സവത്തിനായി മുപ്പതിന് വൈകുന്നേരം വീണ്ടും തുറക്കും. 2024 ജനുവരി 15 നാണ് മകരവിളക്ക്.
