ശിശുദിനാഘോഷം : ജില്ലാതല പരിപാടി ചെറുതോണിയില്‍
ജില്ലയിലെ ശിശുദിനാഘോഷപരിപാടികള്‍ക്ക് 14 ന് വാഴത്തോപ്പ് സര്‍ക്കാര്‍ ഹൈസ്‌കൂള്‍ ഗ്രൗണ്ടില്‍ രാവിലെ 8 ന് ജില്ലാ കളക്ടര്‍ ഷീബാ ജോര്‍ജ് പതാക ഉയര്‍ത്തുന്നതോടെ തുടക്കമാകും. ശിശുദിനറാലി വാഴത്തോപ്പ് ഗ്രാമപഞ്ചായത്ത് പ്രസിഡന്റ് ജോര്‍ജ് പോള്‍ ഫ്‌ളാഗ് ഓഫ് ചെയ്യും. തുറന്ന ജീപ്പില്‍ കുട്ടികളുടെ പ്രധാനമന്ത്രി നയിക്കുന്ന റാലിയില്‍ ബാന്‍ഡ് വാദ്യം, നിശ്ചലദൃശ്യങ്ങള്‍ എന്നിവ ഉണ്ടാകും. പൈനാവ് സര്‍ക്കാര്‍ യു.പി. സ്‌കൂള്‍, വാഴത്തോപ്പ് ഹൈസ്‌കൂള്‍, വി എച്ച് എസ് എസ്, കേന്ദ്രീയ വിദ്യാലയം, പൈനാവ് മോഡല്‍ റെസിഡന്‍ഷ്യല്‍ സ്‌കൂള്‍, മണിയാറന്‍കുടി സര്‍ക്കാര്‍ സ്‌കൂള്‍, ഗിരിജ്യോതി പബ്ലിക് സ്‌കൂള്‍, വാഴത്തോപ്പ് സെന്റ് ജോര്‍ജ്ജ് എച്ച്.എസ്.സ്‌കൂള്‍ എന്നിവിടങ്ങളില്‍ നിന്നുള്ള വിദ്യാര്‍ഥികള്‍ റാലിയില്‍ പങ്കെടുക്കും . തുടര്‍ന്ന് ചെറുതോണി ടൗണ്‍ ഹാളില്‍ നടക്കുന്ന പൊതുസമ്മേളനം കുട്ടികളുടെ പ്രധാനമന്ത്രിയായി തെരെഞ്ഞെടുക്കപ്പെട്ട ഇടുക്കി ന്യൂമാന്‍സ് എല്‍ പി സ്‌കൂളിലെ ഹന്നാ തോമസ് ഉദ്ഘാടനം ചെയ്യും. കുട്ടികളുടെ സ്പീക്കര്‍ ആയി തെരെഞ്ഞെടുക്കപ്പെട്ട പുളിയന്മല കാര്‍മ്മല്‍ പബ്ലിക് സ്‌കൂളിലെ ജൊഹാല്‍ ജയ്സണ്‍ ജോണ്‍ അധ്യക്ഷത വഹിക്കും. ജില്ലാ ശിശു ക്ഷേമസമിതി നടത്തിയ പ്രസംഗ മത്സരത്തില്‍ നിന്നാണ് കുട്ടികളുടെ പ്രധാനമന്ത്രിയെയും സ്പീക്കറെയും തെരെഞ്ഞെടുത്തത്. സമിതി നടത്തിയ വിവിധ മത്സരങ്ങളിലെ ജേതാക്കള്‍ക്കുള്ള പുരസ്‌കാര വിതരണം പരിപാടിയില്‍ നടക്കും. ഇടുക്കി ബ്ലോക്ക് പഞ്ചായത്ത് പ്രസിഡന്റ് രാജി ചന്ദ്രന്‍ ശിശുദിന സ്റ്റാമ്പ് പ്രകാശനം ചെയ്യും. എ.ഡി.എം ഷൈജു പി. ജേക്കബ് ശിശുദിനസന്ദേശവും അവാര്‍ഡ് വിതരണവും നടത്തും. കൂടാതെ ജില്ലയില്‍ വിവിധ മേഖലകളില്‍ കഴിവ് തെളിയിച്ച കുട്ടികളെ ശിശുദിനത്തില്‍ ആദരിക്കുമെന്ന് ജില്ലാ ശിശുക്ഷേമ സമിതി സെക്രട്ടറി ഡിറ്റാജ് ജോസഫ് അറിയിച്ചു.
