കൊട്ടാരക്കര ദിണ്ഡു​ഗൽ ദേശീയ പാതയിൽ പീരുമേട് പുതിയ പാലത്തിന് സമീപം പാതയോരത്ത് ക്രാഷ് ബാരിയർ സ്ഥാപിക്കണമെന്ന ആവശ്യം ശക്തം

വർഷങ്ങൾക്ക് മുൻപ് കെ എസ് ആർ ടി സി നിയന്ത്രണം നഷ്ടമായി ഇവിടെ അഴുത ആറ്റിലേക്ക് മറിഞ്ഞിരുന്നു . അപകടത്തിൽ ഏഴ് പേർ മരിക്കുകയും നിരവധി പേർക്ക് പരിക്ക് പറ്റുകയും ചെയ്തിരുന്നു. അന്നുമുതൽ ഉയരുന്ന ആവശ്യമാണ് ഇവിടെ റോഡരുകിൽ ക്രാഷ് ബാരിയർ സ്ഥാപിക്കണം എന്നത് . എന്നാൽ വർഷങ്ങൾ കഴിഞ്ഞിട്ടും നടപടി എങ്ങുമെത്തിയിട്ടില്ല .

പ്രധാന പാതയായതിനാൽ രാത്രിയിലും പകലുമായി നിരവധി വാഹനങ്ങൾ കടന്നുപോകുന്നതാണ്. പൊതുമരാമത്ത് വകുപ്പ് അധികൃതർ വിഷയത്തിൽ വേണ്ടത്ര ഗൗരവം എടുക്കാത്തതാണ് ക്രാഷ് ബാരിയർ നിർമ്മിക്കാൻ വൈകുന്നതെന്ന ആക്ഷേപവും ശക്തമാണ് . ഇതോടെപ്പം പീരുമേട് വലിയ പാലത്തിലെ ഇരുവശത്തെയും കൈവരികൾ തകർച്ചയുടെ വക്കിലെത്തിയിട്ട് നാളുകൾ കഴിഞ്ഞിട്ടും ഇത് ബലവത്താക്കാനും നടപടി ഉണ്ടായിട്ടില്ല.