കുടുംബ വഴക്ക് അന്വേഷിക്കാനെത്തിയ സബ് ഇൻസ്പെക്ടർക്ക് നേരേ ഗൃഹനാഥന്റെ ആക്രമണം

കുടുംബ വഴക്ക് അന്വേഷിക്കാൻ പോയ സബ് ഇൻസ്പെക്ടർക്ക് നേരേ ആക്രമണം.കട്ടപ്പന പൊലീസ് സ്‌റ്റേഷനിലെ എസ് ഐ
ഡി.സുരേഷിനാണ് പരിക്കേറ്റത്.കാഞ്ചിയാർ ലബ്ബക്കട കൽതൊട്ടിയിലാണ് സംഭവം. ഉദ്യോഗസ്ഥനെ ഇരുപതേക്കർ താലൂക്ക് ആശുപത്രിയിൽ പ്രവേശിപ്പിച്ചു. ചൊവ്വാഴ്ച്ച വൈകിട്ട് 7 മണിയോടെയാണ് ഭർത്താവ് മദ്യപിച്ചെത്തി വഴക്കുണ്ടാക്കുന്നതായി യുവതി പൊലീസിനെ വിളിച്ചറിയിച്ചത്.ഇതേ തുടർന്ന് സുരേഷും മറ്റ് 2 പൊലീസ് ഉദ്യോഗസ്ഥരും ഇവിടേയ്ക്ക് എത്തുകയായിരുന്നു.തുടർന്ന് മദ്യപിച്ച് വഴക്കുണ്ടാക്കിയ കൽത്തൊട്ടി സ്വദേശി സന്തോഷിനെ പൊലീസ് വാഹനത്തിലേയ്ക്ക് കയറ്റാൻ ശ്രമിക്കുന്നതിനിടെ ഇയാൾ എസ് ഐ യെ മർദ്ദിക്കുകയായിരുന്നു.ഉടനെ ഒപ്പമുണ്ടായിരുന്നവർ മർദ്ദിച്ചയാളെ പിടിച്ചുമാറ്റുകയും എസ് ഐയെ ആശുപത്രിയിൽ പ്രവേശിപ്പിക്കുകയുമായിരുന്നു.എസ് ഐയെ ആക്രമിച്ച ചിരട്ടവയലിൽ സന്തോഷിനെ പൊലീസ് കസ്റ്റഡിയിലെടുത്തിട്ടുണ്ട്.