ബൈക്കിൽ ഹെൽമറ്റ് സൂക്ഷിക്കുന്നവർ ജാഗ്രതൈ;ആക്റ്റീവായി തസ്കരൻമാർ

കട്ടപ്പനയിൽ ഹെൽമറ്റ് മോഷണം പതിവാകുന്നു.പാർക്കിംഗ് സ്ഥലങ്ങളിൽ നിർത്തിയിട്ടിരിക്കുന്ന ബൈക്കുകളിൽ നിന്നാണ് കാറിൽ എത്തുന്ന സംഘം ഹെൽമറ്റുകൾ മോഷ്ടിക്കുന്നത്.കഴിഞ്ഞ ദിവസം സെന്റ് ജോൺസ് ആശുപത്രിയുടെ പാർക്കിങ്ങിൽ വച്ചിരുന്ന ബൈക്കിൽ നിന്ന് അയ്യായിരം രൂപ വിലയുള്ള ആക്സർ ഹെൽമെറ്റ്‌ മോഷ്ടിച്ചതാണ് അവസാനത്തെ സംഭവം.സംഘത്തിലെ ഒരാൾ കാറിൽ നിന്ന് ഇറങ്ങി ബൈക്കിൽ വെച്ചിരുന്ന ഹെൽമെറ്റ്‌ എടുക്കുന്നതും പിന്നീട് വാഹനത്തിൽ കയറി പോകുന്നതും സിസിറ്റിവിയിൽ പതിഞ്ഞിട്ടുണ്ട്.എന്നാൽ വാഹന നമ്പർ വ്യക്തമല്ല.ജൂൺ 23 ന് വെള്ളയാംകുടിയിൽ വ്യാപാര സ്ഥാപനത്തിന് മുൻപിൽ വെച്ചിരുന്ന ബൈക്കിൽ നിന്നും ജാക്കറ്റും ഹെൽമറ്റും മോഷണം പോയിരുന്നു.അന്ന് ഉടമയുടെ പരാതിയിൽ പൊലീസ് ഒരാളെ പിടികൂടുകയും ചെയ്തിരുന്നു.ഇതിന് ശേഷം ഐ റ്റി ഐ ജങ്ഷനിൽ നിന്നും മറ്റൊരു ബൈക്കിൽ സൂക്ഷിച്ചിരുന്ന പുത്തൻ ഹെൽമറ്റും മോഷണം പോയി.വില കൂടിയ ഹെൽമറ്റുകൾ തിരഞ്ഞു പിടിച്ചാണ് മോഷ്ടാക്കൾ അപഹരിക്കുന്നത്.ഇതിന് പിന്നിൽ ഒരു സംഘം പ്രവർത്തിക്കുന്നുണ്ടോയെന്നും പോലീസ് പരിശോധിക്കുന്നുണ്ട്.