സ്വർണവിലയിൽ വൻ കുതിപ്പ്; കൂടിയത് 1200 രൂപ, പവന് 44,240 രൂപയായി
സംസ്ഥാനത്ത് ശനിയാഴ്ച സ്വര്‍ണവിലയില്‍ സമീപകാലത്തെ ഏറ്റവും ഉയര്‍ന്ന വര്‍ധന രേഖപ്പെടുത്തി. പവന്റെ വില 1,200 രൂപയാണ് കൂടിയത്. 43,040 രൂപയായിരുന്ന പവന്റെ വില ഇതോടെ 44,240 രൂപയായി.ഗ്രാമിനാകട്ടെ 150 രൂപ കൂടി 5530 രൂപയുമായി. ഒരാഴ്ചക്കിടെ 3,520 രൂപയുടെ വര്‍ധന.
യുഎസിലും യൂറോപ്പിലും സാമ്ബത്തിക പ്രതിസന്ധി രൂക്ഷമായതും ബാങ്കുകള്‍ തകര്‍ച്ച നേരിട്ടതുമാണ് സ്വര്‍ണം നേട്ടമാക്കിയത്. അന്താരാഷ്ട്ര വിപണിയില്‍ സ്‌പോട്‌ ഗോള്‍ഡ്‌ വില ട്രോയ് ഔണ്സിന് 1,988 ഡോളറിലാണ് വ്യാപാരം നടന്നത്.
വില 44,000 കടന്നതോടെ ഒരു പവന് സ്വര്‍ണം വാങ്ങാന്‍ 48,000 രൂപയോളം മുടക്കേണ്ട സ്ഥിതിയായി. ഏറ്റവും കുറഞ്ഞ പണിക്കൂലിയായ അഞ്ച് ശതമാന പ്രകാരമാണ് ഇത്രയൂം വില നല്‍കേണ്ടിവരിക.
2008-ലും സാമ്ബത്തിക മാന്ദ്യം സ്വര്‍ണ വിലയില്‍ വന്‍ കുതിപ്പുണ്ടാക്കിയിരുന്നു. ഒരു ട്രോയ് ഔണ്സിന് 700 ഡോളര്‍ ഉണ്ടായിരുന്ന സ്വര്‍ണ വില 2011-ല്‍ 1,900 ഡോളറിലേക്ക് എത്തിയിരുന്നു. അന്ന് ഒരവസരത്തില്‍ പവന് വില 24,240 രൂപയിലെത്തി. 9,200 രൂപയില്‍ നിന്നായിരുന്നു ആ മുന്നേറ്റം.
