അഖിലേഷിൻ്റെ നിർണായക നീക്കം; യുപിയിൽ എസ്പി – എഎപി സഖ്യത്തിന് കളമൊരുങ്ങുന്നു, പ്രതിപക്ഷ പ്രചാരണത്തിന് സിജെപിയും

ഉത്തർ പ്രദേശ് നിയമസഭാ തെരഞ്ഞെടുപ്പിൽ സമാജ്വാദി പാർട്ടി (എസ്പി) – ആം ആദ്മി പാർട്ടി (എഎപി) സഖ്യത്തിന് സാധ്യത. എഎപി എംപി സഞ്ജയ് സിങ് എസ്പി അധ്യക്ഷൻ അഖിലേഷ് യാദവുമായി ലഖ്നൗവിൽ കൂടിക്കാഴ്ച നടത്തി. അതിനിടെ, പ്രതിപക്ഷ പ്രചാരണത്തിനായി കോക്റോച്ച് ജനത പാർട്ടിയും (സിജെപി) ഇറങ്ങും. തെരഞ്ഞെടുപ്പിൽ മത്സരിക്കാനില്ലെന്ന് വ്യക്തമാക്കിയ സിജെപി, സമ്മർദ ഗ്രൂപ്പായി തുടരാനാണ് തീരുമാനിച്ചിരിക്കുന്നത്. യുപി കോർഡിനേഷൻ കമ്മിറ്റിയിൽ സിജെപി 16 പേരെ ഉൾപ്പെടുത്തി. തെരഞ്ഞെടുപ്പ് പ്രചാരണത്തിലെ സിജെപി സാന്നിധ്യം ഗുണം ചെയ്യുമെന്ന വിലയിരുത്തലിലാണ് എസ്പി.
ബിജെപിക്കും പ്രതിപക്ഷത്തിനും ഏറ്റവും നിർണായകമായ ഉത്തർ പ്രദേശ് നിയമസഭാ തെരഞ്ഞെടുപ്പിൽ പ്രതിപക്ഷ പാർട്ടികൾ കൈകോർക്കാൻ ഒരുങ്ങുകയാണോ എന്ന ചോദ്യമാണ് ലഖ്നൗവിൽ രണ്ട് ദിവസമായി നടന്ന കൂടിക്കാഴ്ചകൾ ഉയർത്തുന്നത്. എഎപി എംപി സഞ്ജയ് സിങ്ങിനു പുറമേ, സിപിഐ (എംഎൽ) ജനറൽ സെക്രട്ടറി ദിപാങ്കർ ഭട്ടാചാര്യയുമായും അഖിലേഷ് യാദവ് കൂടിക്കാഴ്ച നടത്തിയിട്ടുണ്ട്. എസ്പി – കോൺഗ്രസ് സീറ്റ് വിഭജന ചർച്ചകൾ ആരംഭിക്കാനാരിക്കെ ആണ് വ്യാഴം, വെള്ളി ദിവസങ്ങളിലായി ഇരുനേതാക്കളെയും അഖിലേഷ് യാദവ് കണ്ടത്. നിലവിൽ എഎപി, അഖിലേഷ് യാദവ് ഉൾപ്പെടുന്ന ഇന്ത്യ സഖ്യത്തിനൊപ്പമല്ല. ഈ സാഹചര്യത്തിൽ തെരഞ്ഞെടുപ്പിന് മുന്നോടിയായി നടന്ന കൂടിക്കാഴ്ച ശ്രദ്ധേയമാണ്. എഎപിയുമായുള്ള സഖ്യത്തിന് അഖിലേഷ് യാദവ് താൽപര്യം അറിയിച്ചുവെന്നാണ് സൂചന.
കഴിഞ്ഞ വർഷം ജുലൈയിലാണ് എഎപി ഇന്ത്യ സഖ്യം വിടുന്നതായി സഞ്ജയ് സിങ് പ്രഖ്യാപിച്ചിരുന്നത്. 2022ലെ ഉത്തർ പ്രദേശ് നിയമസഭാ തെരഞ്ഞെടുപ്പ് കാലത്തും സഖ്യസാധ്യത ചർച്ചചെയ്ത് സഞ്ജയ് സിങ്ങും അഖിലേഷ് യാദവും കൂടിക്കാഴ്ച നടത്തിയിരുന്നെങ്കിലും സീറ്റ് വിഭജനത്തെച്ചൊല്ലി ചർച്ച വഴിമുട്ടിയിരുന്നു. പിന്നീട് എഎപി തനിച്ചു മത്സരിച്ചെങ്കിലും ഒരു സീറ്റിൽ പോലും വിജയിക്കാൻ കഴിഞ്ഞില്ല.













































































































































