Idukki വാര്‍ത്തകള്‍
നെടുങ്കണ്ടത്ത് പണിയായുധങ്ങൾ മോഷ്ടിച്ച രണ്ടുപേർ പിടിയിൽ
നെടുങ്കണ്ടത്ത് ഏലം സ്റ്റോറില്‍നിന്ന് പണിയായുധങ്ങള്‍ മോഷ്ടിച്ച്‌ കടത്താന്‍ ശ്രമിച്ച രണ്ടുപേര്‍ പിടിയില്‍. നെടുങ്കണ്ടം കോമ്ബയാര്‍ സ്വദേശി പുതുകില്‍ സുരേഷ്, കൈലാസനാട് പുതിയകോവില്‍ നന്ദന്‍ എന്നിവരാണ് അറസ്റ്റിലായത്.നെടുങ്കണ്ടത്തിനടുത്ത് പാറത്തോട്ടിലെ ഏലം സ്‌റ്റോറിലെ ജോലിക്കാരായ ഇരുവരും മണ്ണിളക്കാന്‍ ഉപയോഗിക്കുന്ന ഉപകരണങ്ങള്‍ ഇവിടെനിന്ന് മോഷ്ടിക്കുകയായിരുന്നു.
മോഷ്ടിച്ച ഉപകരണങ്ങളുമായി ഓട്ടോയില്‍ സഞ്ചരിക്കുകയും ഉപകരണങ്ങള്‍ വില്‍ക്കാന്‍ പറ്റുന്ന കടകളെ കുറിച്ച്‌ ഡ്രൈവറോട് അന്വേഷിക്കുകയും ചെയ്തു. സംശയം തോന്നിയ ഡ്രൈവര്‍ നെടുങ്കണ്ടം പൊലീസില്‍ അറിയിക്കുകയായിരുന്നു. പൊലീസ് വഴിയില്‍ കാത്തുനിന്ന് ഇരുവരെയും പിടികൂടി. പൊലീസ് അറിയിച്ചപ്പോഴാണ് സ്‌റ്റോര്‍ ഉടമ മോഷണ വിവരം അറിയുന്നത്. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.
