സര്‍ക്കാര്‍ സംവിധാനം അഴിമതി രഹിതമാക്കും-മുഖ്യമന്ത്രിമുട്ടം വിജിലന്‍സ് ട്രെയിനിങ് സെന്റര്‍ ഉദ്ഘാടനം ചെയ്തു
സര്‍ക്കാര്‍ സംവിധാനം മുഴുവന്‍ അഴിമതി രഹിതമാക്കുകയാണ് സര്‍ക്കാരിന്റെ ലക്ഷ്യമെന്ന് മുഖ്യമന്ത്രി പിണറായി വിജയന്‍. വിജിലന്‍സ് ആന്‍ഡ് ആന്റി കറപ്ഷന്‍ ബ്യൂറോ ഇടുക്കി യൂണിറ്റില്‍ പണികഴിപ്പിച്ച മുട്ടം ട്രെയിനിങ് സെന്റര്‍, സോളാര്‍ പവര്‍ പ്ലാന്റ് എന്നിവയുടെ ഉദ്ഘാടനം ഓണ്‍ലൈനായി നിര്‍വഹിച്ചു സംസാരിക്കുകയായിരുന്നു അദ്ദേഹം. സര്‍ക്കാര്‍ വകുപ്പുകള്‍ പൂര്‍ണ്ണമായും അഴിമതി രഹിതമാണെന്ന് പറയുന്നില്ല. ചില പുഴുക്കുത്തുകള്‍ ഉദ്യോഗസ്ഥര്‍ക്കിടയില്‍ അവശേഷിക്കുന്നുണ്ട്. ഇവരെക്കൂടി കണ്ടെത്തി സര്‍ക്കാര്‍ സംവിധാനം മുഴുവന്‍ അഴിമതി രഹിതമാക്കും. സംസ്ഥാനത്ത് വിജിലന്‍സിന്റെ പ്രവര്‍ത്തനം മികച്ചതും മാതൃകാപരവുമാണെന്നും മുഖ്യമന്ത്രി പറഞ്ഞു.
വിജിലന്‍സ് ആന്‍ഡ് ആന്റി കറപ്ഷന്‍സ് ബ്യൂറോ ശക്തിപ്പെടുത്തുന്നതിനായുള്ള അടിസ്ഥാന സൗകര്യ വികസനത്തിന്റെ ഭാഗമായാണ് ട്രെയിനിങ് സെന്റര്‍ നിര്‍മ്മിക്കുകയും ലിഫ്റ്റ് സ്ഥാപിക്കുകയും ചെയ്തത്. ആധുനിക സൗകര്യങ്ങളോടെയാണ് വിജിലന്‍സ് ഓഫീസില്‍ ട്രെയിനിങ് സെന്റര്‍ സജ്ജീകരിച്ചിരിക്കുന്നത്. പൊതുമരാമത്ത് വകുപ്പ് എസ്റ്റിമേറ്റിന്റെ അടിസ്ഥാനത്തില്‍ വിജിലന്‍സ് വകുപ്പില്‍ നിന്നും അനുവദിച്ച 34,35,105 രൂപ ഉപയോഗിച്ചായിരുന്നു നിര്‍മ്മാണം. മുട്ടത്തെ വിജിലന്‍സ് കെട്ടിടത്തിന്റെ രണ്ടാം നിലയിലാണ് ട്രെയിനിങ് സെന്റര്‍ സജ്ജീകരിച്ചിരിക്കുന്നത്. പൂര്‍ണ്ണമായും എയര്‍ കണ്ടീഷന്‍ ചെയ്ത ട്രെയിനിങ് ഹാളില്‍ പബ്ലിക് അഡ്രസ് സിസ്റ്റം, പ്രൊജക്ടര്‍, പോഡിയം എന്നിവയുള്‍പ്പെടെ സജ്ജീകരിച്ചിട്ടുണ്ട്. ഇതോടൊപ്പം മുട്ടം വജിലന്‍സ് ഓഫീസിന്റെ ടെറസില്‍ സോളാര്‍ പാനലുകളും സ്ഥാപിച്ചു.
ജലവിഭവ വകുപ്പ് മന്ത്രി റോഷി അഗസ്റ്റിന്‍ ഓണ്‍ലൈനായി അധ്യക്ഷത വഹിച്ചു. മുട്ടം വിജിലന്‍സ് ഓഫീസ് ഹാളില്‍ നടത്തിയ പ്രാദേശിക ചടങ്ങിന്റെ ഉദ്ഘാടനം പി.ജെ. ജോസഫ് എം.എല്‍.എ. നിര്‍വഹിച്ചു. പി.ഡബ്ല്യു.ഡി അസിസ്റ്റന്റ് എക്സിക്യൂട്ടീവ് എഞ്ചിനീയര്‍ രമ്യ പി.എസ്. റിപ്പോര്‍ട്ട് അവതരിപ്പിച്ചു. ക്രൈംബ്രാഞ്ച് എസ്.പി കെ.എം ജിജിമോന്‍, വിജിലന്‍സ് ഡിവൈ.എസ്.പി ഷാജു ജോസ്, ഇന്റലിജന്‍സ് ഡിവൈ.എസ്.പി ആര്‍. സന്തോഷ് കുമാര്‍, ക്രൈംബ്രാഞ്ച് ഡിവൈ.എസ്.പി കെ.സദന്‍, സി.ഐമാരായ ടിപ്സണ്‍ തോമസ്, പ്രിന്‍സ് ജോസഫ് എന്നിവര്‍ പ്രസംഗിച്ചു.
ഫോട്ടോ: കേരള വിജിലൻസ് വകുപ്പ് മുട്ടം ഓഫീസിൽ നടപ്പാക്കുന്ന വിവിധ വികസന പ്രവർത്തങ്ങളായ ട്രയിനിങ്ങ് സെന്റർ, സോളാർ പ്ലാന്റ്, ലിഫ്റ്റ് എന്നിവയുടെ ഉദ്ഘാടനം മുഖ്യമന്ത്രി പിണറായി വിജയൻ ഓൺെലൈനായി നിർവ്വഹിച്ചു. പി ജെ ജോസഫ് എം എൽ എ ശിലാഫലകം അനാച്ഛാദനം നിർവ്വഹിക്കുന്നു.
