പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ പ്രതി അറസ്റ്റിൽ
ചെറുതോണി: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ പ്രതി പിടിയില്‍. കോതമംഗലം പോത്താനിക്കാട് സ്വദേശി വേലംപ്ലാക്കല്‍ സാജനെയാണ് (40) മുരിക്കാശ്ശേരി പൊലീസ് കോയമ്ബത്തൂരില്‍നിന്ന് പിടികൂടിയത്.
ഇയാളെ വെള്ളിയാഴ്ച കോടതിയില്‍ ഹാജരാക്കും. രണ്ടുമാസം മുമ്ബാണ് കേസിനാസ്പദമായ സംഭവം. മുരിക്കാശ്ശേരി പൊലീസ് സ്റ്റേഷന്‍ പരിധിയിലെ പെണ്‍കുട്ടിയുടെ അമ്മ നല്‍കിയ പരാതിയിലാണ് അറസ്റ്റ്. പൊലീസ് കേസെടുത്ത് അന്വേഷണം ആരംഭിച്ചതോടെ പ്രതി ഒളിവില്‍ പോകുകയായിരുന്നു.
മൊബൈല്‍ ഫോണ്‍ ഉപയോഗിക്കാതെ കര്‍ണാടകയിലും തമിഴ്നാട്ടിലും കറങ്ങി നടന്ന ഇയാളെ മുരിക്കാശ്ശേരി പൊലീസിലെ പ്രത്യേക അന്വേഷണ സംഘമാണ് പിടികൂടിയത്. ഇടുക്കി എ.എസ്.പി രാജ് പ്രസാദിന്‍റെ നേതൃത്വത്തില്‍ മുരിക്കാശ്ശേരി എസ്.ഐ എന്‍.എസ്. റോയി, എ.എസ്.ഐ പി.ഡി. സേവ്യര്‍, സീനിയര്‍ സിവില്‍ പൊലീസ് ഓഫിസര്‍ കെ.ആര്‍. അനീഷ് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.
