സ്വപ്‌നയുടെ ആരോപണങ്ങള്‍; ജനങ്ങളെ അണിനിരത്തി പ്രതിരോധിക്കുമെന്ന് കൊടിയേരി

തിരുവനന്തപുരം: സ്വർണക്കടത്ത് കേസിലെ പ്രതി സ്വപ്ന സുരേഷ് ഉന്നയിച്ച ഏറ്റവും പുതിയ ആരോപണങ്ങൾക്ക് പിന്നിൽ രാഷ്ട്രീയ ഗൂഡാലോചനയുണ്ടെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. മുഖ്യമന്ത്രിയെയും കുടുംബത്തെയും അപകീർത്തിപ്പെടുത്തുകയാണ് ഇതിനുപിന്നിലെ ലക്ഷ്യം. ഇത്തരം ആരോപണങ്ങൾ ഹ്രസ്വകാലം മാത്രമുള്ളതാണെന്നും കോടിയേരി പറഞ്ഞു. ഷാജ് കിരണിന്റെ ശബ്ദരേഖ സ്വപ്ന പുറത്തുവിട്ടതിന് പിന്നാലെ തിരുവനന്തപുരത്ത് നടത്തിയ വാർത്താസമ്മേളനത്തിലായിരുന്നു കോടിയേരിയുടെ പ്രതികരണം. പഴയ വിവാദങ്ങൾ വീണ്ടും ആളിക്കത്തിച്ചതിന് പിന്നിൽ രാഷ്ട്രീയ ലക്ഷ്യമുണ്ട്. കലാപങ്ങളും സംഘട്ടനങ്ങളും ഊതിപ്പെരുപ്പിച്ച് രാഷ്ട്രീയ അസ്ഥിരത സൃഷ്ടിക്കാനുള്ള ശ്രമങ്ങളാണ് നടക്കുന്നത്. അത്തരം കള്ളക്കഥകൾക്കും കലാപങ്ങൾക്കും ഞങ്ങൾ വഴങ്ങില്ല. ഇക്കാര്യത്തിൽ സമഗ്രമായ അന്വേഷണം വേണം. ജനങ്ങളെ അണിനിരത്തി രാഷ്ട്രീയ പ്രചാരണം നടത്തുമെന്നും കോടിയേരി പറഞ്ഞു. വൈരുദ്ധ്യങ്ങൾ നിറഞ്ഞതാണ് സ്വപ്ന കോടതിയിൽ നൽകിയ മൊഴി. സ്വർണക്കടത്ത് കേസിൽ ശിവശങ്കറിന് പങ്കില്ലെന്നായിരുന്നു ആദ്യ മൊഴി. പിന്നീട് അത് മാറി. മുഖ്യമന്ത്രിക്കെതിരെ മൊഴി നൽകാൻ തന്നെ നിർബന്ധിക്കുകയാണെന്നും സ്വപ്ന പറഞ്ഞിരുന്നു. എന്നാൽ ഇന്ന് കഥ മാറി. ഓരോ ഘട്ടത്തിലും വ്യത്യസ്ത രീതിയിലാണ് പ്രസ്താവനകൾ നടത്തുന്നത്. പുതുതായി ഉയർന്നുവന്ന ആരോപണത്തിലെ ഒരേയൊരു പുതിയ കാര്യം ബിരിയാണി ചെമ്പിന്റെ ബന്ധം മാത്രമാണ്. ഖുർആനിലും ഈന്തപ്പഴത്തിലും സ്വർണം കടത്തിയതായി അന്ന് ആരോപണം ഉയർന്നിരുന്നു. സ്വപ്നയുടെ ഇപ്പോഴത്തെ മൊഴി എത്രമാത്രം വിശ്വസനീയമാണെന്ന് കോടതി പരിശോധിക്കണമെന്നും കോടിയേരി പറഞ്ഞു.