2025വരെ സന്ദീപ് സിങ്ങിന്റെ കരാർ നീട്ടിയതായി കേരള ബ്ലാസ്റ്റേഴ്സ്

ഡിഫൻഡർ സന്ദീപ് സിങ്ങിന്റെ കരാർ 2025 വരെ നീട്ടിയതായി കേരള ബ്ലാസ്റ്റേഴ്സ് എഫ്സി അറിയിച്ചു. 2020 ഡിസംബറിൽ കേരള ബ്ലാസ്റ്റേഴ്സ് എഫ്സിയിൽ ചേർന്ന 27 കാരനായ താരം കഴിഞ്ഞ രണ്ട് ഇന്ത്യൻ സൂപ്പർ ലീഗ് (ഐഎസ്എൽ) സീസണുകളിലും ടീമിന്റെ ഭാഗമായിരുന്നു.

മണിപ്പൂർ സ്വദേശിയായ അദ്ദേഹം ഷില്ലോങ് ലജോങ് അക്കാദമിയിലൂടെയാണ് ഫുട്ബോൾ കരിയർ ആരംഭിച്ചത്. 2014ലാണ് ഇവരുടെ സീനിയർ ടീമിലേക്ക് സ്ഥാനക്കയറ്റം ലഭിച്ചത്. തൊട്ടടുത്ത വർഷം പൂനെ എഫ് സിക്കെതിരെയാണ് അദ്ദേഹം അരങ്ങേറ്റം കുറിച്ചു. 2017 ൽ ലാങ്‌സ്‌നിങ് എഫ്സിയിൽ ചേർന്ന അദ്ദേഹം 2018-19 ഐഎസ്എൽ സീസണിൽ ഐടികെ എഫ്സിയുമായി കരാർ ഒപ്പിട്ടു. 2019-20 ഐ ലീഗ് സീസണിൽ അദ്ദേഹം ട്രാവു എഫ്സിയിലേക്ക് മാറി. തുടർന്നാണ് ഈ ഡിഫൻഡർ പിന്നീട് കേരള ബ്ലാസ്റ്റേഴ്സ് എഫ്സിയിൽ ചേർന്നത്.

2020ൽ ബെംഗളൂരു എഫ്സിക്കെതിരെയാണ് സന്ദീപ് സിംഗ് ബ്ലാസ്റ്റേഴ്സിനായി അരങ്ങേറ്റം കുറിച്ചത്. അതേ സീസണിൽ ഗോവ എഫ്സിക്കെതിരെ ഹീറോ ഓഫ് ദി മാച്ച് പുരസ്കാരവും നേടി. വിംഗ്-ബാക്ക്, സെന്റർ-ബാക്ക് പൊസിഷനുകളിൽ അനായാസം കളിച്ച് അദ്ദേഹം തന്റെ കഴിവ് തെളിയിച്ചു. 28 മത്സരങ്ങളിൽ ബ്ലാസ്റ്റേഴ്സ് ജേഴ്സി അണിഞ്ഞ സന്ദീപ് സിംഗ് ഇതുവരെ 89 ടാക്കിളുകളും 16 ഇന്റർസെപ്ഷനുകളും ഒരു അസിസ്റ്റും നേടിയിട്ടുണ്ട്.

കെബിഎഫ്സിയുമായുള്ള കരാർ പുതുക്കാൻ കഴിഞ്ഞതിൽ അവിശ്വസനീയമാംവിധം ആവേശവും അഭിമാനവുമുണ്ടെന്ന് സന്ദീപ് സിംഗ് പറഞ്ഞു. “2020-21 സീസണിൽ ക്ലബ്ബിനായി അരങ്ങേറ്റം കുറിച്ച എനിക്ക് അവിശ്വസനീയമായ നിമിഷമായിരുന്നു, ഓരോ മത്സരത്തിലും എന്റെ പ്രകടനം മെച്ചപ്പെടുത്തുന്നത് തുടരാൻ ഞാൻ ആഗ്രഹിക്കുന്നു. ഞങ്ങളുടെ വലിയ ആരാധകവൃന്ദത്തിന് മുന്നിൽ കളിക്കാൻ.
ഞാൻ ആകാംക്ഷയോടെ കാത്തിരിക്കുകയാണ്, എന്നെ നയിക്കാൻ സഹായിക്കുന്ന അവരുടെ സ്നേഹത്തിന്റെ മഴ ഇതിനകം തന്നെ ഞാൻ അനുഭവിച്ചിട്ടുണ്ട്,” സന്ദീപ് സിംഗ് പറഞ്ഞു.