മുതിർന്നപൗരന്മാരുടെ ക്ഷേമത്തിനായി ജില്ലയിൽ പുതിയ പദ്ധതി ” തണൽ “

ജില്ലയിലെ മുതിർന്നപൗരന്മാരുടെ ക്ഷേമത്തിനായി പുതിയ പദ്ധതി ആരംഭിക്കുന്നു. ഇടുക്കി സബ് കളക്ടർ അനൂപ് ഗർഗിന്റെ നേതൃത്വത്തിലാണ് ” തണൽ ” എന്നപേരിൽ പ്രവർത്തനങ്ങൾ ഏകോപിപ്പിക്കുന്നത്.
പദ്ധതിയുടെ ഭാഗമായി മുതിർന്നവർക്ക് സഹായം നല്കാൻ സന്നദ്ധതയുള്ള വോളൻ്റിയർമാരെ തൊടുപുഴ , ഇടുക്കി , പീരുമേട് താലൂക്കുകളിൽ ആവശ്യമുണ്ടെന്ന് സബ് കളക്ടർ അറിയിച്ചു.
2007 ലെ മാതാപിതാക്കളുടെയും മുതിർന്ന പൗരന്മാരുടെയും പരിപാലന, ക്ഷേമ നിയമപ്രകാരം,
മുതിർന്നവർക്ക് അർഹമായ പരിചരണം ലഭിക്കുന്നുണ്ടെന്ന് ഉറപ്പാക്കുന്നതിന് രേഖാമൂലം നിർദേശം നൽകിയാലും പലപ്പോഴും പാലിക്കപ്പെടുന്നതായി കാണുന്നില്ല. പ്രായാധിക്യവും അജ്ഞതയും മൂലം മുതിർന്നവർ പരാതിപ്പെടാറുമില്ല. ഇങ്ങനെയുള്ളവർക്ക് വേണ്ട സഹായം നല്കുന്നതിനാണ് വോളൻ്റിയർമാരെ ആവശ്യമുള്ളത്.

അൽപനേരം സംസാരിച്ചാൽ മുതിർന്നവരിൽ പലർക്കും വലിയ ആശ്വാസമായിരിക്കും ലഭിക്കുകയെന്ന് സബ് കളക്ടർ പറഞ്ഞു. നേരിട്ട് കഴിഞ്ഞില്ലെങ്കിൽ ഫോണിൽ വിളിച്ചാലും മതി.
അൽപനേരം കേട്ടിരുന്നാൽ തന്നെ അവരുടെ ജീവിതം കൂടുതൽ ഊഷ്മളമാകും. ഇത്തരത്തിൽ മുതിർന്നവർക്കുമായി ഇടപഴകാനും അവർക്ക് ലഭിക്കേണ്ട അവകാശങ്ങളെക്കുറിച്ചും ആനുകൂല്യങ്ങളെക്കുറിച്ചും ഓർമ്മപ്പെടുത്തേണ്ടതുണ്ട്. ട്രൈബ്യൂണൽ ഉത്തരവുകളുടെ നടത്തിപ്പ് നിരീക്ഷിക്കുകയും പ്രതിമാസ റിപ്പോർട്ട് തയ്യാറാക്കലും വോളന്റിയര്മാരുടെ പ്രധാന ചുമതലയാകും.
താല്പര്യമുള്ളവർക്ക് [email protected] എന്ന ഇമെയിൽ വിലാസത്തിലോ 8547615005 മൊബൈലിലോ ബന്ധപ്പെടാവുന്നതാണെന്നും അദ്ദേഹം അറിയിച്ചു.