കട്ടപ്പന ഫെസ്റ്റിന് ഇന്ന് തിരി തെളിയും

കട്ടപ്പന ഫെസ്റ്റിന് ഇന്ന് തിരി തെളിയും. വൈകിട്ട് ആറുമണിക്ക് കെ വി വി ഇ എസ് സംസ്ഥാന പ്രസിഡൻ്റ് രാജു അപ്‌സര ഫെസ്റ്റ് ഉദ്ഘാടനം ചെയ്യും. മർച്ചൻ്റ്സ് അസോസിയേഷൻ ജനറൽ സെക്രട്ടറി കെ പി ഹസൻ അധ്യക്ഷത വഹിക്കും. നഗരസഭ ചെയർപേഴ്‌സൺ ബീന ടോമി ഭദ്രദീപം തെളിക്കും. 35സ്റ്റാളുകൾ ഉൾപ്പെടെ 100 ലധികം സ്റ്റാളുകൾ, കാർഷിക വ്യാവസായിക പ്രദർശനം, ഫാഷൻ ഷോ, സ്നോ പാർക്ക്, ഫ്ലവർഷോ, അക്വാ പെറ്റ് ഷോ, ഫുഡ് ഫെസ്റ്റ്, വിവിധ കമ്പനികളുടെ കാറുകളുടെയും ബൈക്കുകളുടെയും പ്രദർശനം എന്നിവയെല്ലാമാണ് ഫെസ്റ്റിൽ ഉൾപ്പെടുത്തിയിരിക്കുന്നത്.

എല്ലാ ദിവസവും പ്രമുഖർ പങ്കെടുക്കുന്ന സ്റ്റേജ് ഷോകളും നടക്കും. എം ജി ശ്രീകുമാർ, സ്റ്റീഫൻ ദേവസി, ഹരിശ്രീ അശോകൻ,രമ്യ നമ്പീശൻ,കൃഷ്ണപ്രഭ, ഡിജെ സാവിയോ, അൻവർ സാദത്ത്, രാജേഷ് ചേർത്തല, ദുർഗാ വിശ്വനാഥ് തുടങ്ങിയവർ അണിനിരക്കുന്ന പരിപാടികളാണ് വിവിധ ദിവസങ്ങളിലായി ക്രമീകരിച്ചിരിക്കുന്നത്. റോട്ടറി ക്ലബ് ഹെറിറ്റേജിൻ്റെ നേതൃത്വത്തിൽ എജ്യുക്കേഷൻ എക്സ്പോയും നടക്കും. ശനി, ഞായർ ദിവസങ്ങളിൽ രാവിലെ 11 മുതൽ രാത്രി 10 വരെയും, മറ്റു ദിവസങ്ങളിൽ വൈകിട്ട് 4 മുതൽ രാത്രി 10 വരെയും ആണ് പ്രവേശനം . 100 രൂപയാണ് പ്രവേശന പാസ് നിരക്ക്. എല്ലാദിവസവും രണ്ടുപേർക്ക് പ്രവേശിക്കാവുന്ന രീതിയിൽ ആയിരം രൂപയുടെ പ്രത്യേക പാസും ഏർപ്പെടുത്തിയിട്ടുണ്ട്. ഫെസ്റ്റിൽ ഇന്ന് രാത്രി 7.30 ന് അശ്വതി സൗണ്ട് & ഈവന്റ്സ് ഒരുക്കുന്ന ‘കാഴ്ച്‌ചക്കാരെ സംഗീതത്തിൻ്റെ മാസ്‌മരിക ലോകത്തേക്ക് ആനയിക്കുന്ന DJ സാവിയോയുടെ ലൈവ് മ്യൂസിക് നൈറ്റ് അരങ്ങേറും.