യുവതിയുടെ മുഖത്ത് മുളക് പൊടിയെറിഞ്ഞ് കടന്ന് പിടിക്കാൻ ശ്രമം,കൗമാരക്കാരൻ കട്ടപ്പന പോലീസിന്റെ കസ്റ്റഡിയിലായി
കട്ടപ്പന:യുവതിയുടെ മുഖത്ത് മുളക് പൊടിയെറിഞ്ഞ് കടന്ന് പിടിക്കാൻ ശ്രമിച്ച പതിനാറ്കാരനെ പോലീസ് കസ്റ്റഡിയിൽ എടുത്തു.കട്ടപ്പന നിരപ്പേൽകടയിൽ ചൊവ്വാഴ്ച വൈകിട്ട് അഞ്ച് മണിയോടെയാണ് സംഭവം.ഭർത്താവ് ജോലിക്ക് പോയ ശേഷം വീട്ടിൽ ഒറ്റക്കായിരുന്ന യുവതിയാണ് അതിക്രമത്തിന് ഇരയായത്.വാതിലിൽ മുട്ടുന്നത് ഭർത്താവാണെന്ന് കരുതി തുറന്നപ്പോൾ കൗമാരക്കാരൻ യുവതിയുടെ മുഖത്തേക്ക് മുളക്പൊടി എറിഞ്ഞ ശേഷം മുഖത്തിടിച്ച് കീഴ്പ്പെടുത്തുവാൻ ശ്രമിക്കുകയായിരുന്നു.എന്നാൽ യുവതി ചെറുത്ത് നിന്ന് ബഹളം വച്ചതോടെ പ്രതി ഓടിരക്ഷപെട്ടു.കണ്ണട വെച്ച് തുണി കൊണ്ട് മുഖം മറച്ച നിലയിലായിരുന്നു അക്രമി.തുടർന്ന് ഭർത്താവിനൊപ്പം പോലീസ് സ്റ്റേഷനിൽ എത്തി യുവതി പരാതി നൽകി.പോലീസിന് ലഭിച്ച രഹസ്യ വിവരങ്ങളുടെ അടിസ്ഥാനത്തിലാണ് ഇവരുടെ അയൽവാസിയായ കൗമാരക്കാരനെ കസ്റ്റഡിയിൽ എടുത്തത്.ഇയാൾ കുറ്റം സമ്മതിച്ചതായാണ് വിവരം.എന്നാൽ പ്രായപൂർത്തിയാകാത്തതിനാൽ ജുവനൈൽ ബോർഡിന് റിപ്പോർട്ട്‌ നൽകിയ ശേഷം പ്രതിയെ മാതാപിതാക്കൾക്കൊപ്പം വിട്ടയച്ചു.
