വ്യവസായ ഉൽപ്പന്ന പ്രദർശന വിപണന മേള 20 മുതൽ
ഇടുക്കി ജില്ലാ വ്യവസായ കേന്ദ്രത്തിന്റെയും ഉടുമ്പൻചോല താലൂക്ക് വ്യവസായ ഓഫീസിന്റെയും കട്ടപ്പന മുനിസിപാലിറ്റിയുടെയും സംയുക്ത ആഭിമുഖ്യത്തില്‍ കട്ടപ്പന മുനിസിപാലിറ്റി ഗ്രൗണ്ടില്‍ ഡിസംബര്‍ 20 മുതല്‍ 24 വരെ വ്യവസായ ഉല്‍പ്പന്ന പ്രദര്‍ശന വിപണന മേള ‘യേ എക്സ്പോ 2022’ (വൈ ഇ- സംരംഭക വര്‍ഷ പ്രദര്‍ശനം) സംഘടിപ്പിക്കും.ഡിസംബര്‍ 20, ചൊവ്വാഴ്ച്ച രാവിലെ 11 മണിക്ക് കട്ടപ്പന മുനിസിപല്‍ ചെയര്‍പേഴ്സണ്‍ ഷൈനി സണ്ണി ചെറിയാന്‍ മേള ഉദ്ഘാടനം ചെയ്യും. മേളയില്‍ സംരംഭകരുടെ മുപ്പതിലധികം സ്റ്റാളുകള്‍ ഒരുക്കിയിട്ടുണ്ട്. സാങ്കേതിക ശില്‍പ്പശാല, സംരംഭക ബോധവല്‍ക്കരണ പരിപാടികള്‍, സംരംഭകത്വ ഹെല്‍പ് ഡെസ്ക്, ക്രിസ്തുമസ് കേക്ക് മേള എന്നിവയും ഒരുക്കിയിട്ടുണ്ട്.വളരുന്ന സാങ്കേതിക വിദ്യയും ആധുനിക വിപണന സാധ്യതകളും എന്ന വിഷയത്തില്‍ ഡിസംബര്‍ 21, 22 തീയതികളില്‍ സാങ്കേതിക ശില്‍പശാല സംഘടിപ്പിക്കും. ഇടുക്കി ജില്ലാ വ്യവസായ കേന്ദ്രം ജനറല്‍ മാനേജര്‍ സി. ജയ ഉദ്ഘാടനം ചെയ്യും. ഇടുക്കി ജില്ലാ വ്യവസായ കേന്ദ്രം മാനേജര്‍ സാഹില്‍ മുഹമ്മദ്‌ അധ്യക്ഷത വഹിക്കും. ആധുനിക പാക്കേജിംഗ് സാങ്കേതിക വിദ്യ, ഡിജിറ്റല്‍ മാര്‍ക്കറ്റിങ്, എക്സ്പോര്‍ട്ടിങ് നടപടികള്‍ എന്നിവയെ അടിസ്ഥാനപ്പെടുത്തിയാണ് ശില്‍പ്പശാല. ബന്ധപ്പെട്ട മേഖലയിലെ വിദഗ്ധര്‍ ക്ലാസുകള്‍ക്ക് നേതൃത്വം നല്‍കും. രാവിലെ 9.30 ന് രജിസ്ട്രേഷന്‍ ആരംഭിക്കും.
