എ.ടി.എമ്മില്‍ നിന്ന് പണമെടുക്കുന്നതുപോലെ ഇനി സ്വര്‍ണവും നേടാം
ഹൈദരാബാദ്: എ.ടി.എമ്മില്‍ നിന്ന് പണമെടുക്കുന്നതുപോലെ ഇനി സ്വര്‍ണവും നേടാം. ഡെബിറ്റ്/ക്രെഡിറ്റ് കാര്‍ഡുകള്‍ ഉപയോഗിച്ച്‌ സ്വര്‍ണനാണയങ്ങള്‍ എടുക്കാവുന്ന എ.ടി.എം ഒരുക്കിയിരിക്കുകയാണ് ഹൈദരാബാദ് ആസ്ഥാനമായ ഗോള്‍ഡ്സിക്ക പ്രൈവറ്റ് ലിമിറ്റഡ്.ഇന്ത്യയിലെ ആദ്യ ‘ റിയല്‍ടൈം ഗോള്‍ഡ് ഡിസ്‌പെന്‍സിംഗ് മെഷീനാണ്” ഇതെന്ന് കമ്ബനി അഭിപ്രായപ്പെട്ടു.ഹൈദരാബാദിലെ ബീഗംപേട്ടിലുള്ള കമ്ബനിയുടെ ഓഫീസിലാണ് ഗോള്‍ഡ് എ.ടി.എം സ്ഥാപിച്ചത്. രണ്ടുവര്‍ഷത്തിനകം ഇന്ത്യയിലെമ്ബാടുമായി 3,000 ഗോള്‍ഡ് എ.ടി.എമ്മുകള്‍ സ്ഥാപിക്കുകയാണ് കമ്ബനിയുടെ ലക്ഷ്യം. 0.5 ഗ്രാം, ഒരു ഗ്രാം, രണ്ടുഗ്രാം, 5 ഗ്രാം, 10 ഗ്രാം, 20 ഗ്രാം, 50 ഗ്രാം, 100 ഗ്രാം എന്നിങ്ങനെ അളവിലെ സ്വര്‍ണനാണയങ്ങളാണ് ഗോള്‍ഡ് എ.ടി.എമ്മില്‍ ലഭിക്കുക.ബാങ്കിംഗ് സിസ്‌റ്റവുമായും സ്വര്‍ണവില നിര്‍ണയ സംവിധാനങ്ങളുമായും ബന്ധിപ്പിച്ച്‌ അതിസുരക്ഷാ സംവിധാനങ്ങളോടെയാണ് എ.ടി.എം ഒരുക്കിയിട്ടുള്ളത്. യൂറോപ്പ്, ഗള്‍ഫ്, അമേരിക്ക എന്നിവിടങ്ങളില്‍ നിലവില്‍ ഗോള്‍ഡ് എ.ടി.എമ്മുകളുണ്ടെന്ന് കമ്ബനി വ്യക്തമാക്കി.
