വാഹനം പഴയതാണെന്ന പരിഭവം വേണ്ട, പുതിയ എൻജിൻ ഘടിപ്പിക്കാം

വാഹനം പഴയതാണെന്ന പരിഭവം വേണ്ട, പുതിയ എൻജിൻ ഘടിപ്പിക്കാം. ഷാസി പഴഞ്ചനാണെങ്കിൽ അതുമാറ്റാം. പെട്രോൾ, ഡീസൽ വാഹനങ്ങൾ പ്രകൃതിവാതകത്തിലേക്കും വൈദ്യുതിയിലേക്കും മാറ്റാം. അംഗീകാരമുള്ള കിറ്റ് ഉപയോഗിക്കണമെന്ന് മാത്രം.

അംഗീകൃത സ്ഥാപനങ്ങളിൽനിന്നുള്ള സാക്ഷ്യപത്രം ഉൾപ്പെടെ അപേക്ഷനൽകിയാൽ രജിസ്ട്രേഷൻ സർട്ടിഫിക്കറ്റിൽ രേഖപ്പെടുത്തി നൽകും. ഇതുൾപ്പെടെ വാഹനങ്ങളിൽ അനുവദനീയമായ മോടിപിടിപ്പിക്കലുകൾക്കുള്ള (ഓൾട്ടറേഷൻ) മാർഗനിർദേശങ്ങൾ മോട്ടോർവാഹനവകുപ്പ് പരസ്യപ്പെടുത്തി. അതേകമ്പനിയുടെ എൻജിനും ഷാസിയും മാറ്റിവെക്കാനാണ് അനുമതി.

ഇവ അനുവദിക്കില്ല

റോഡ് സുരക്ഷയെ ബാധിക്കാനിടയുള്ള മോടിപിടിപ്പിക്കൽ, ടയർ അളവ്, ലൈറ്റ്സ്, അളവുകൾ, ടയറിൽ നിന്നും മുന്നിലേക്കും പിന്നിലേക്കുള്ള തള്ളിനിൽക്കുന്ന ഭാഗം (ഓവർഹാങ്), ബ്രേക്ക്, സ്റ്റിയറിങ്, സൈലൻസർ എന്നിവയിലെ മാറ്റം.

അനുമതിയുള്ളവ

അടിസ്ഥാന മോഡലിൽ വാഹനനിർമാതാവ് നിഷ്കർഷിച്ചുള്ള വസ്തുക്കൾ ഉപയോഗിച്ചുള്ള നവീകരണം. സ്കൂൾ ബസുകളുടെ ഉൾവശം സ്കൂൾകുട്ടികൾക്ക് സൗകര്യപ്രദമായവിധം മാനദണ്ഡംപാലിച്ച് മാറ്റംവരുത്താം.

കാരവനുകൾക്ക് ഇളവ്

മൂന്നുവർഷത്തിനുമേൽ പഴക്കമുള്ള വാഹനങ്ങൾ കാരവാനായി മാറ്റാം. ബോഡികോഡ് പാലിക്കേണ്ടതില്ല. പകരം സൗണ്ട് എൻജിനിയറിങ് പ്രാക്ടീസ് അനുസരിച്ച് മോട്ടോർവാഹന നിയമങ്ങളും ചട്ടങ്ങളും പാലിക്കണം. സസ്പെൻഷൻ, ബ്രേക്ക്, ഇന്ധനസംവിധാനം, ഷാസി എന്നിവയിൽ മാറ്റം വരുത്തരുത്.

മൂന്നുവർഷത്തിൽതാഴെ പഴക്കമുള്ള വാഹനങ്ങൾ കാരവനാക്കുകയാണെങ്കിൽ ബോഡി കോഡ് പാലിക്കണം. അംഗീകൃത ഫാക്ടറികളിൽമാത്രമേ പുതിയ വാഹനങ്ങൾ നിർമിക്കാനാകൂ. കേടായ വാഹനങ്ങൾ നീക്കുന്ന റിക്കവറി വാഹനങ്ങൾ നിർമിക്കാനും അനുമതിനൽകി. നിലവിലുള്ള വാഹനങ്ങളുടെ ചേസിസിൽ മാറ്റം വരുത്താതെ ഇവ നിർമിക്കാം.