രാഹുലിന്റെ ഗ്യാരന്റി കാർഡുകൾ കേരളത്തിലും; കോൺഗ്രസിന്റെ തെരഞ്ഞെടുപ്പ് ഉറപ്പുകൾ പ്രഖ്യാപിക്കും

കർണാടകയിലെയും തെലങ്കാനയിലെയും കോൺഗ്രസിന്റെ വൻ വിജയത്തിന് അടിത്തറയിട്ട രാഹുൽ ഗാന്ധിയുടെ ‘ഗ്യാരന്റി കാർഡുകൾ’ കേരളത്തിലേക്കും. പുതു യുഗ യാത്രയുടെ സമാപന സമ്മേളനത്തിൽ വെച്ച് രാഹുൽ ഗാന്ധി കോൺഗ്രസ് അധികാരത്തിൽ എത്തിയാൽ നടപ്പാക്കാൻ പോകുന്ന പ്രധാന തെരഞ്ഞെടുപ്പ് ഉറപ്പുകൾ അഥവാ ഗ്യാരണ്ടികൾ പ്രഖ്യാപിക്കും.

സ്ത്രീകൾ, യുവജനങ്ങൾ, വയോജനങ്ങൾ എന്നിവരെ ലക്ഷ്യമിട്ടുള്ള 3-4 പ്രധാന പദ്ധതികളാണ് ആദ്യഘട്ടത്തിൽ പ്രഖ്യാപിക്കുക. കർണാടകയിൽ അഞ്ച് ഗ്യാരന്റികളും തെലങ്കാനയിൽ ആറ് ഗ്യാരന്റികളും പ്രഖ്യാപിച്ച് അധികാരം പിടിച്ചെടുത്ത അതേ മാതൃകയാണ് കേരളത്തിലും രാഹുൽ ഗാന്ധി ലക്ഷ്യമിടുന്നത്.

സാധാരണക്കാരുടെ ജീവിതനിലവാരം ഉയർത്തുന്നതിനും വിലക്കയറ്റം തടയുന്നതിനും നേരിട്ട് ഗുണം ലഭിക്കുന്ന പദ്ധതികൾക്കായിരിക്കും മുൻഗണന. മറ്റ് സംസ്ഥാനങ്ങളിൽ ധന സഹായം ഉൾപ്പെടെയുള്ള പ്രഖ്യാപനങ്ങൾ വരുത്തിയ രാഷ്ട്രീയ മാറ്റം കേരളത്തിൽ നടപ്പാകുമോ എന്ന പരീക്ഷണം കൂടിയാകും കോൺഗ്രസിന് ഈ നീക്കം.

തെരഞ്ഞെടുപ്പ് അടുത്തതോടെ കേരളത്തിൽ എൽഡിഎഫ്- യുഡിഎഫ് പോരാട്ടം കനക്കുകയാണ്. പതിവ് തെറ്റിച്ച് കൈവിട്ടുപോയ ഭരണം പിടിക്കാൻ കോൺഗ്രസ് ശക്തമായ ആസൂത്രണത്തിലാണ്. എന്നാൽ ഹാട്രിക് അടിക്കുമെന്ന ആത്മവിശ്വാസത്തിലാണ് എൽഡിഎഫ് ക്യാമ്പ്. ശക്തമായ മുന്നൊരുക്കങ്ങൾക്കിടയിലും പാർട്ടിയിലെ ഭിന്നതകൾ കോൺഗ്രസിന് തലവേദയാകുന്ന സാഹചര്യവും നിലനിൽക്കുന്നുണ്ട്.