സർവ്വം മായ തന്നെ! അല്ലേ അളിയാ!….”അതേ അളിയാ”സർവ്വം മായ’ സെക്കൻഡ് ലുക്ക് പോസ്റ്റർ ശ്രദ്ധേയമാകുന്നു

മലയാളികളുടെ പ്രിയപ്പെട്ട നിവിൻ പോളി – അജു വർഗ്ഗീസ് കോംമ്പോ വെള്ളിത്തിരയിൽ 15 വർഷം പൂർത്തിയാക്കുന്നു. ഈ വേളയിൽ ഇരുവരും ഒന്നിക്കുന്ന പത്താമത്തെ ചിത്രമായ ‘സർവ്വം മായ’യുടെ സെക്കൻഡ് ലുക്ക് പോസ്റ്റർ എത്തിയിരിക്കുകയാണ്. ഫാന്റസി കോമഡി വിഭാഗത്തിൽ ഒരുങ്ങുന്ന ചിത്രം പ്രേക്ഷകർക്ക് മുമ്പ് കാണാത്തൊരു വേഷപ്പകർച്ചയിലാണ് ഈ താരജോഡിയെ അവതരിപ്പിക്കുന്നത്.

സെക്കന്റ് ലുക്ക് പോസ്റ്ററിൽ ചിരിയോടെ കൂടെ നിൽക്കുന്ന നിവിൻ പോളിയെയും അജു വർഗ്ഗീസിനെയും കാണാം. ഇത് ചിത്രത്തിന്റെ കോമിക് സ്വഭാവത്തിന് ഊന്നൽ നൽകുന്നു. കൂടാതെ ഒരു ഗ്രാമീണ പശ്ചാത്തലത്തിലാണ് കഥ നടക്കുന്നതെന്ന സൂചനയും പോസ്റ്റർ നൽകുന്നുണ്ട്. “സർവ്വം മായ തന്നെ! അല്ലേ അളിയാ!” എന്ന അടിക്കുറിപ്പോടെ നിവിൻ പോളി പോസ്റ്റർ പങ്കുവെച്ചപ്പോൾ, “അതേ അളിയാ” എന്ന് അജു വർഗ്ഗീസ് കമന്റ് ചെയ്തത് ആരാധകർ ഏറ്റെടുത്തു. ചിത്രത്തിന്റെ ഫസ്റ്റ് ലുക്ക് പോസ്റ്ററും ഏറെ ശ്രദ്ധ നേടിയിരുന്നു.