കര്‍ഷകനു നേരെ കരടിയുടെ ആക്രമണം ; കണ്ണുകള്‍ പിഴുതെടുത്തു
ഇടുക്കി: തമിഴ്‌നാട്ടിലെ ലോവര്‍ ക്യാമ്പിനു സമീപം കര്‍ഷകനെ കരടി ആക്രമിച്ച് കണ്ണുകള്‍ പിഴുതെടുത്തു. മുഖം വികൃതമാക്കി. ഗുരുതരമായി പരുക്കേറ്റ
ഗൂഡല്ലൂര്‍ സ്വദേശി ഗോപാലിനെ (60) ആദ്യം തേനി മെഡിക്കല്‍ കോളജിലും പിന്നീട് മധുര മെഡിക്കല്‍ കോളജിലും പ്രവേശിപ്പിച്ചു. ഇന്നലെ രാവിലെ ഏഴിന് ലോവര്‍ ക്യാമ്പിനും ഗൂഡല്ലുരിനുമിടയില്‍ പെരുമാള്‍ കോവില്‍ ഫോറസ്റ്റ് സ്‌റ്റേഷനടുത്ത് വച്ചാണ് സംഭവം. ഗോപാലിനൊപ്പം സുഹൃത്ത് ഗൂഡല്ലൂര്‍ സ്വദേശി രാമറും ഉണ്ടായിരുന്നു. രാമര്‍ ഓടി മാറിയതിനാല്‍ ആക്രമണത്തില്‍ നിന്ന് രക്ഷപെട്ടു. ഗോപാലിന്റെ കൃഷി സ്ഥലത്തേക്ക് പോവുകയായിരുന്നു ഇരുവരും. ഇവര്‍ സഞ്ചരിച്ചിരുന്ന ബൈക്ക് റോഡ് സൈഡില്‍ വച്ച ശേഷം കൃഷിയിടത്തേക്ക് കയറുന്നതിനിടെയായിരുന്നു കരടിയുടെ ആക്രമണം. നിലവിളി കേട്ട് ആളുകള്‍ ഓടിക്കൂടിയതോടെയാണ് കരടി പിന്‍മാറിയത്. ഗോപാലിന്റെ കണ്ണുകള്‍ കരടി പിഴുതെടുത്തു. ദേഹമാസഹലം കടിച്ച് കീറി. പരുക്ക് ഗുരുതരമായതിനാല്‍ തേനി മെഡിക്കല്‍ കോളജില്‍ നിന്ന് മധുര മെഡിക്കല്‍ കോളജിലേക്ക് മാറ്റുകയായിരുന്നു.
