ഇരട്ടയാർ പള്ളിയിൽ നാടകം കണ്ടുമടങ്ങിയ ആളെ സംഘം ചേർന്ന് ആക്രമിച്ചതായി പരാതി

ഇരട്ടയാർ പള്ളി തിരുനാളിൻ്റെ നാടകം കണ്ടുമടങ്ങിയ ആളെ സംഘം ചേർന്ന് ആക്രമിച്ചതായി പരാതി. ഞായറാഴ്ച രാത്രിയിലാണ് സംഭവം. ഇരട്ടയാർ നോർത്ത് സ്വദേശി ഹരികുമാറിനെ (58)യാണ് ആക്രമിച്ചത്. ഇയാളെ നെടുങ്കണ്ടം താലൂക്ക് ആശുപത്രിയിൽ പ്രവേശിപ്പിച്ചു.

ഹരികുമാറിന്റെ വാഹനത്തിന് കുറുകെ മറ്റൊരു വാഹനം പാർക്ക് ചെയ്‌തിരുന്നു. ഈ വാഹനം മാറ്റിത്തരാൻ പറഞ്ഞതിൽ പ്രകോപിതരായ സംഘം ഹരികുമാറിനെ മർദിക്കുകയായിരുന്നു. ഞായറാഴ്ച‌ രാത്രി 11-മണിയോടുകൂടി മൂന്നംഗസംഘമാണ് ആക്രമണം നടത്തിയത്. ഇടത് കണ്ണിനും വലത് ചെവിക്കും പുറത്തിനും പരിക്കേറ്റതിനെത്തുടർന്ന് നാട്ടുകാരുടെ സഹായത്തോടെ നെടുങ്കണ്ടം താലൂക്ക് ആശുപത്രിയിൽ പ്രവേശിപ്പിച്ചു. കട്ടപ്പന പോലീസ് കേസെടുത്തു.